Bursat europiane mbyllin një javë të qetë – Investitorët po presin të dhënat mbi punësimin në SHBA
Bursat europiane po qëndrojnë në rritje në sesionin e sotëm, ndërsa investitorët në të gjithë botën po presin të dhënat kyçe mbi punësimin në SHBA, për nëntorin. Indeksi pan-Europian Stoxx 600 po qëndron në rritje me 0.3%, ndërsa sektori i udhëtimeve kryeson fitimet, në rritje me 1.2%.
Të dhënat mbi punësimin në SHBA do të japin një panoramë më të qartë mbi vendimet që do të marrë Rezerva Federale në lidhje me normat e interesit vitin e ardhshëm.
Optimizmi për uljen e normave të interesit në SHBA bëri që Wall Street të realizonte fitime në sesionin e kaluar, me indeksin Nasdaq Composite që u rrit me 1.4%. Ndërsa tregjet në rajonin e Azi-Paqësorit patën një performancë mikse, për shkak të rishikimit në rënie të Prodhimit të Brendshëm Bruto në Japoni.
Për sa i përket korporatave, aksionet e Anglo American janë në rënie me rreth 5%, pasi kompania minerare njoftoi planet për të ulur shpenzimet kapitale me 1.8 miliardë dollarë, deri në vitin 2026, për shkak të rënies së kërkesës për metale.
Ndërkohë, kompanitë e prodhimit të automjeteve elektrike, si Tesla, BYD dhe BMW kanë fituar shumë vëmendje nga investitorët gjatë këtij viti. Megjithatë, një analist investimesh thotë se mënyra më e mirë për të luajtur në sektorin e automjeteve elektrike është investimi në ekosistemin më të gjerë.
“Ne e pëlqejmë makinat, por problemi me kompanitë elektrike është se ka pak që janë fitimprurëse për momentin”, deklaroi për CNBC Steven Glass, drejtor menaxhues dhe analist i investimeve në Pella Funds, duke iu referuar Teslas.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.