Si mund të ndërpresin vendet e BE-së importet e mbetura të gazit rus!

Një propozim i ri i BE-së do t’u japë shteteve anëtare fuqinë për të ndaluar kompanitë në Rusi dhe Bjellorusi nga aksesi i tubacioneve europiane dhe terminaleve të LNG, pjesërisht ose plotësisht, raportoi Financial Times duke cituar një projekt-tekst ligjor të propozuar nga Brukseli.

Nëse miratohet, kompanitë energjetike të BE-së mund të kenë një bazë ligjore për të dalë nga kontratat me ofruesit rusë të gazit pa pasur nevojë të paguajnë kompensim, shkruan raporti duke cituar një zyrtar të lartë të BE-së.

Propozimi vjen pasi BE-ja po përpiqet të heqë plotësisht gazin rus nga blloku deri në vitin 2027, pa një ndalim të plotë të importeve të gazit rus.

Importet e gazit të BE-së nga Rusia janë ulur që nga pushtimi i Ukrainës në shkurt 2022. Megjithatë, një e dhjeta e importeve totale të gazit të BE-së ende vijnë nga Rusia.

Në fakt, të dhënat tregojnë se blerjet e bllokut të gazit natyror të lëngshëm (LNG) nga Rusia janë rritur midis janarit dhe korrikut të vitit 2023 krahasuar me nivelet e paraluftës.

Vendet anëtare kanë qëndrime të ndryshme, ndërsa Holanda ka marrë një qasje të vendosur kundër dërgesave të gazit rus, Belgjika, Spanja dhe Franca ende lejojnë importin dhe eksportin e gazit rus, duke thënë se kompanitë e tyre e kanë të vështirë të largohen nga kontratat ekzistuese.

Negociatorët nga vendet anëtare dhe Parlamenti Europian pritet të miratojnë tekstin paraprak të premten, shtoi raporti i FT.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.