Buxheti paguan 68.5 milionë euro për kreditë e OSHEE – Mori 81.5 milionë euro borxh me garanci sovrane për importin e energjisë, por blerjet i bën KESH
Operatori i Shpërndarjes së Energjisë Elektrike nuk ka mundur të likujdojë kreditë e marra nga bankat e nivelit të dytë në fund të vitit që kaloi, duke aktivizuar garancinë sovrane të vendosur nga qeveria.
Në total, OSHEE mori 81.5 mln euro nga 4 banka, ndërkohë që përgjatë 7 muajve të parë të vitit buxheti i shtetit ka paguar rreth 68.5 mln euro për likujdimin e tyre. Sipas treguesve fiskalë të publikuar nga Ministria e Financave dhe Ekonomisë, plani për 7 muajt e parë të vitit është realizuar në masën 99%.
Megjithatë, mbetet e paqartë se për çfarë janë shpenzuar kreditë e marra nga OSHEE, duke qenë se vlera parashikohej të shkonte për financimin e kapitalit punues, në kuadër të nevojave për import të energjisë, teksa me një vendim qeverie tashmë blerjet e energjisë po menaxhohen nga Korporata Elektronergjetike Shqiptare.
Përgjatë gjithë kësaj periudhe, OSHEE ka kryer vetëm 1 blerje energjie, që shërben për plotësimin e nevojave të biznesve të liberalizuar, të lidhur në tensionin 35 KV.
Përmes kësaj blerjeje mbulohen nevojat vjetore për energji, teksa vlera totale arrin në 14 mln euro, përfshirë edhe mbulimin e humbjeve në rrjet. Por, likujdimi i kredive pranë bankave të nivelit të dytë nuk është mbështetja e vetme buxhetore e qeverisë për sektorin energjetik. Sipas Aktit Normativ, që ndryshoi buxhetin e shtetit në fund të muajit korrik, janë planifikuar edhe 20 mld lekë të tjera që do të duhet të disbursohen në vijim.
Përveç 4 kredive me mbështetje buxhetore, në fund të vitit që shkoi OSHEE mori një kredi prej 50 mln euro, nga Agjencia Franceze për Zhvillim, për funskionimin e bursës së energjisë, si dhe konsolidimin e kompanive të krijuara nga ndarja e OSHEE-së.
Ndërkohë që, gjatë muajit tetor, mori një hua prej 70 mln euro nga Banka Evropiane për Rindërtim dhe Zhvillim, që do të shkojë për financimin e projektit për reagimin ndaj krizës së shkaktur nga COVID-19. Praktikisht, vlera totale e kredive të marra nga OSHEE arrin në 201.5 mln euro.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.