Çfarë ndryshon në buxhetin e vitit 2023? Rritet fondi i kontigjencës, 200 milionë lekë për Kombëtaren

Në mbyllje të vitit 2023, përmes një akti normativ qeveria ka ndryshuar sërish buxhetin, ku dhe ka vendosur në dispozicion një fond prej rreth 1.4 miliardë lekësh për shpërblimin e shtresave  në  nevojë.

Por cilat janë ndryshimet e tjera?

Referuar aktit normativ,  është minimizuar me 1.6 miliardë lekë fondi për kompensimin e ish pronarëve.

Qeveria ka vendosur gjithashtu të ulë vlerën e huamarrjes afatgjatë të destinuara për projekte nga 20.8 miliardë lekë në afro 13.5 miliardë lekë.

Referuar aktit normativ, shpenzimet e buxhetit qendror ulen në 509.6 miliardë lekë; fondi rezervë i buxhetit dhe  kontingjenca shkon në 18 980 milionë lekë, duke regjistruar rritje me afro 1.8 miliardë lekë, ndërsa kontingjenca për rrisqet e borxhit, nuk ka ndryshuar duke qëndruar në nivelin 4.9 miliardë lekë.

Qeveria ka vendosur të japë 3 miliardë lekë në  formën  e huadhënies  nga  buxheti  i  shtetit  për  shoqërinë  e navigimit ajror. Ndërsa fondi  prej  200  milionë  lekësh  në  programin  “Zhvillimi i sportit”, të Ministrisë së Arsimit dhe  Sportit, do të   përdoret   për   mbështetjen   e   Ekipit  Kombëtar   të   Futbollit   në   kuadër   të   UEFA  EURO 2024.

Fondi i veçantë i institucioneve buxhetore prej është rritur me 400 milionë lekë duke u regjistruar në 700 milionë lekë.

Gjithashtu është vendosur të rritet sërish fondi rezerve me 200 milionë lekë, ku shtesa do të shkojë për raste të paparashikuara  të  njësive të qeverisjes së  përgjithshme, të cilat tashmë do të kenë në dispozicion 2.2 miliardë lekë.

Për bashkitë, janë akorduar  2 miliardë lekë, fond  i cili do tu shpërndahet  bashkive   në   bazë   të   kritereve   të  formulës    së    përdorur    për    shpërndarjen    e transfertës  së  pakushtëzuar  të  përgjithshme  për vitin  2023.

Elisabeta Dosku/SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.