Ari, i qëndrueshëm pranë 2,035 USD – Tregjet presin të dhënat mbi inflacionin në SHBA
Ari po qëndron në rritje të lehtë në sesionin e sotëm, ndërsa po mbështetet nga dollari i dobët dhe nga rënia e yield-it të obligacioneve në SHBA. Investitorët po presin të dhënat mbi inflacionin në SHBA, që mund të japin një panoramë më të qartë mbi politikat monetare të Rezervës Federale.
Kontrata “spot” e arit po tregtohet në rreth 2,020 dollarë për onz, ndërsa kontrata “futures” po tregtohet në rreth 2,035 dollarë për onz. Analistët shprehen se dobësimi i lehtë i dollarit në fillim të kësaj jave po ofron një mbështetje për metalin e çmuar. Banka qendrore amerikane sinjalizoi se shtrëngimi historik i politikës monetare gjatë dy viteve të fundit është drejt fundit, ndërsa shumë shpejt do të fillojë ulja e interesave.
Megjithatë, presidenti i Rezervës Federale të Nju Jorkut, John Williams, paralajmëroi tregjet ndaj pritshmërive në rritje për ulje të normave të interesit, duke thënë se poltikëbërësit e bankës qendrore aktualisht nuk po flasin për ulje të interesave dhe shtoi se është e parakohshme të spekulosh rreth tyre.
Tregjet po vlerësojnë rreth 70% shanse, që ulja e parë e interesave të vijë në muajin mars të vitit të ardhshëm. Tregtarët po presin tashmë disa të dhëna ekonomike në SHBA, duke përfshirë Indeksin e Shpenzimeve Personale për nëntorin, që publikohet të premten, të cilat do ta qartësojnë më shumë rrugën që do të ndjekë banka qendrore në SHBA.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.