Cilat janë profesionet e krahut që po sfidojnë “trurin” me paga? – Kamarierët dhe punëtorët e ndërtimit, më të paguar se një financier

Nëse me rritjen e pagave në administratë, paga mesatare ka shkuar në nivelin e rreth 1 mijë eurove në muaj, kjo lloj pagesë do të konsiderohej e ulët për profesionet e krahut për të cilat kanë kërkesë të lartë.

Por konkretisht kush janë ato?

Bumi turistik ka bërë që gjatë kësaj periudhë të rritet ndjeshëm kërkesa për banakierë, kamerierë, kuzhinierë, bariste, të cilët sidomos në zonat bregdetare, nga të dhënat e gjeneruara nga tregu, po paguhen mesatarisht 1300-2000 euro në muaj.

Nga ana tjetër kantieret e hapura në të gjithë vendin kërkojnë punëtorë. Kompanitë e ndërtimit janë detyruar të rrisin pagesat për ustallarët mesatarisht në 70-80 euro dita, duke bërë që pagesa mujore të tejkalojë 1700 euro/ muaj. Kosto e fuqisë punëtore në këtë sektor është pasuar edhe me rritjen e çmimeve të apartamenteve për m2.

Të ndërlidhura me ndërtimin janë profesionet si marangoz, hidraulik, elektricist, të cilët po ashtu kanë pagesa mujore që variojnë  mesatarisht nga  60-70 euro dita, përpos shërbimeve private që kryejnë.

Ndërkohë, referuar të dhënave të INSTAT, gjatë tremujorit të parë 2024, grup-profesionet e “Manaxherëve, Ligjvënësve, Nëpunësve të lartë të administratës shtetërore dhe drejtorëve ekzekutivë” dhe “Specialistë me arsim të lartë (profesionistë)”, ofrojnë pagat mesatare mujore bruto më të larta, krahasuar me pagën mesatare në nivel kombëtar, e regjistruar në rreth 1200 euro në muaj.

Paga më e lartë  mesatare në sektorin privat regjistrohet në aktivitetet financiare dhe të sigurimit, e cila për këtë periudhë është afro 1340 euro. Pra e thënë ndryshe, të gjitha zanatet  sipërpërmendura të cilat janë fizike dhe nuk janë të lidhura me arsim, tejkalojnë pagën më të lartë mesatare të regjistruar në sektorin privat.

Elisabeta Dosku/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.