Cilat shtete na “mbajnë” me verë? – 5 milionë litra vijnë nga importi. Treg edhe për vende si Zelanda e Re dhe Afrika!

Pavarësisht se Shqipëria është një vend me kultivarë autoktonë të rrushit, ku prodhimi i verës por rritet nga dita në ditë dhe kantinat kanë bërë investime serioze për të nxjerrë në treg produkte cilësore, importi sërish vazhdon të jetë dominant.

Të dhënat e Drejtorisë së Përgjithshme të Doganave të siguruara nga SCAN TV, tregojnë se deri në nëntor 2023, vendi ynë ka importuar rreth 5 milionë litra vere nga jashtë kufijve, me një vlerë prej 2 miliardë lekësh apo 19.3 milionë eurosh. Krahasuar me një vit më parë, importi ka pësuar një rënie të lehtë, por sërish qëndron në nivele të rëndësishme.

Por cila është harta e origjinës nga vjen ky produkt? Të dhënat e doganave  tregojnë se Shqipëria importon verë nga 27 vende në total. Vendin e parë  dhe peshën kryesor e mbajnë verërat italiane, ku gjatë vitit të kaluar sasia e këtij produkti ka arritur në 13.9 milionë euro, ndjekur nga Franca me 3.2 milionë euro, dhe më pas vjen nga Kosova me 773 mijë euro import, Maqedonia e Veriut e cila ka sjellë 445 mijë euro produkte, ndjekur nga Spanja, Mali i zi dhe Greqia me një sasi dhe vlerë më të ulët.

Por përpos shteteve tradicionale që mbahen për prodhimin e eksportin e verës, Shqipëria importon edhe nga vende të largëta si Kina, Zelanda e Re, Australia, Argjentina, Australia, Afrika e Jugut, Kili, etj, edhe pse sasia është në vlera të papërfillshme.

Përfaqësues të industrisë shpesh herë kanë bërë prezentë shqetësimet dhe kërkesat për më shumë mbështetje nga ana e qeverisë ndaj prodhimit vendas për shkak të konkurrencës që u vjen nga importi.

Elisabeta Dosku/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.