Cilët janë burimet e të ardhurave për vendorët? – Raporti/ Taksa e ndikimit në infrastrukturë dhe ajo e pronës, kontribut kryesor

Qeverisja vendore nga të ardhurat e burimeve të veta, regjistroi një vlerë prej rreth 35 miliardë lekë, ose rreth 3.3 miliardë lekë më shumë nga niveli i regjistruar në vitin 2022.

Sipas raportit të Qeverisjes Vendore, performanca pozitive e të ardhurave nga burimet e veta është përcaktuar nga kontributi i taksave me +15.7% si dhe tarifat vendore me +9.4%.

Ndikimin më të madh nga taksa e ka dhënë taksa e ndikimit në infrastrukturë me +2.87 miliardë lekë dhe taksa mbi pronën +233.3 milionë lekë.

Por si ka rezultuar performanca e bashkive mbi të ardhurat në vitin 2023?

Më shumë se gjysma e bashkive kanë arritur të kenë një performancë pozitive të të ardhurave në këtë periudhë. Sipas raportit bashkitë e cilësuara si të mëdha kanë dhënë kontributin kryesor, ku theksohet bashkia Tiranë me +2.3 miliardë lekë, bashkia Durrës me +300.8 milionë lekë, bashkia Kamëz me +702.7 milionë lekë.

Por nga ana tjetër, performancë negative i atribuohet sërish bashkive të ashtuquajtura të mëdha, të cilat janë si bashkia Vlorë -178 milionë lekë, bashkia Kukës -112.2 milionë lekë, bashkia Shkodër -132.9 milionë lekë dhe bashkia Korçë -100.3 milionë lekë.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.