Çmimet e grurit në bursa bien me 1.5% – Por, regjistrojnë rritje javore për shkak të shqetësimeve të ofertës botërore

Kontratat e së ardhmes së grurit të Çikagos ranë 1.5% të premten, por tregu po regjistron një fitim javor me shtrëngimin e furnizimeve botërore që mbështesin çmimet. Soja dhe misri po mbyllin javën në nivele të ulëta. Kontrata më aktive e grurit në Bordin e Tregtisë së Çikagos është rritur me rreth 3% këtë javë, por gruri po tregtohej me rënie 1.5% në 10.89 dollarë për shinik të premten. Nga ana tjetër, soja dhe misri kanë humbur pothuajse 3% këtë javë.

Çmimet e grurit janë mbështetur nga moti i nxehtë dhe i thatë në të gjithë Indinë që mund të zvogëlojë potencialin e eksportit të atij vendi, ndërsa kushte të ngjashme po dëmtojnë të korrat e grurit dimëror të SHBA-së.

India, një nga prodhuesit më të mëdhenj në botë të grurit, ka regjistruar pesë vjet radhazi të prodhimit rekord të grurit dhe së fundmi ka rritur eksportet për të mbushur boshllëkun e furnizimit si rrjedhojë e luftës në Ukrainë. Por, India këtë javë uli parashikimin e prodhimit të grurit me 6.3 milionë ton, në 105 milionë pasi temperaturat e larta në mes të marsit ulën rendimentet e të korrave.

Edhe në SHBA, moti i thatë në pjesën jugore të vendit ka ndikuar negativisht në prodhimin e grurit. Në Francë, prodhuesi më i madh i grurit në Europë, moti i nxehtë dhe i thatë në 10 ditët e ardhshme pas disa muajsh reshjesh të pakta, do të shkaktojë dëme të shumta në kulturat e drithrave.

Blerta Lata / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.