Çmimet e ushqimeve, në rënie të lehtë – Agjencia e OKB-së, FAO: Siguria globale e ushqimit mbetet shqetësuese

Çmimet botërore të ushqimeve regjistruan rënie të lehtë në prill pasi arritën një rekord të lartë në mars, por siguria globale e ushqimit mbeti një shqetësim për shkak të kushteve të vështira të tregut, deklaroi agjencia e ushqimit e OKB-së.

Indeksi i çmimeve të Organizatës së Ushqimit dhe Bujqësisë (FAO), që ndjek mallrat ushqimore më të tregtuara në nivel global, rezultoi mesatarisht 158.5 pikë muajin e kaluar, kundrejt 159.7 të rishikuar në rritje për muajin mars.

“Rënia e lehtë e indeksit është i mirëpritur, veçanërisht për vendet me deficit ushqimor me të ardhura të ulëta, por megjithatë çmimet e ushqimeve mbeten afër niveleve të tyre të fundit, duke reflektuar shtrëngimin e vazhdueshëm të tregut dhe paraqitur një sfidë për sigurinë ushqimore globale për më të cenuarit. “tha kryeekonomisti i FAO Maximo Torero Cullen.

Megjithëse pësoi një rënie mujore, indeksi i prillit ishte 29.8% më i lartë se një vit më parë, i shtyrë pjesërisht nga shqetësimet mbi ndikimin e pushtimit rus të Ukrainës.

Indeksi i çmimeve të drithrave të agjencisë ra 0.7% në prill, pas një rritje prej 17% në mars. Ndërsa çmimet e misrit ranë me 3%, çmimet e grurit u rritën me 0.2%. FAO tha se çmimi i grurit u ndikua nga bllokimi i porteve në Ukrainë dhe shqetësimet për kushtet e të prodhimit në Shtetet e Bashkuara, megjithatë këto shqetësime u kompensuan pjesërisht nga dërgesat më të mëdha nga India dhe eksportet më të larta se sa pritej nga Rusia.

Indeksi i çmimeve të vajit vegjetal ra me 5.7% në prill, pasi racionimi i kërkesës uli çmimet për vajrat e palmës, lulediellit dhe sojës. Çmimet e sheqerit u rritën me 3.3%, indeksi i çmimit të mishit me 2.2% dhe indeksi i qumështit u rrit me 0.9%.

Në vlerësimet e veçanta të ofertës dhe kërkesës për drithra, FAO uli lehtë projeksionin e saj të prodhimit botëror të grurit në vitin 2022 në 782 milionë ton, nga 784 milionë muajin e kaluar.

Parashikimi faktorizoi një reduktim të pritshëm prej 20% në sipërfaqen e korrur në Ukrainë dhe një rënie të parashikuar të prodhimit në Marok për shkak të një thatësire në këtë vend.

Blerta Lata / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.