Çmimet e naftës rriten mbi 2% – Tregjet frikësohen nga përshkallëzimi i luftës në Ukrainë, pas deklaratës së Putin

Çmimet e naftës u rritën më shumë se 2% të mërkurën pasi presidenti rus Vladimir Putin njoftoi një mobilizim të pjesshëm ushtarak, duke përshkallëzuar luftën në Ukrainë dhe ngritur shqetësimet për furnizimin më të pakët të naftës dhe gazit. Kontratat e së ardhmes së naftës së papërpunuar Brent u rritën me 2,28 dollarë, në 92,90 dollarë për fuçi, ndërsa nafta e papërpunuar e Teksasit Perëndimor u tregtua  86.16 dollarë për fuçi, me rritje 2.22 dollarë.

Putin tha se kishte nënshkruar një dekret për mobilizimin e pjesshëm duke fnisur nga e mërkura, duke pretenduar se po mbronte territoret ruse dhe se Perëndimi dëshironte të shkatërronte vendin. Sipas analistëve, përshkallëzimi I luftës do të çojë në rritjen e pasigurisë mbi furnizimet ruse të energjisë.

Kjo lëvizje mund të çojë në thirrje për veprime më agresive kundër Rusisë në drejtim të sanksioneve nga perëndimi. Sanksionet e Bashkimit Europian që ndalojnë importet e naftës së papërpunuar ruse nëpërmjet rrugëve detare do të hyjnë në fuqi më 5 dhjetor.

Ndërkohë, Shtetet e Bashkuara thanë se nuk prisnin një përparim në ringjalljen e marrëveshjes bërthamore të Iranit të vitit 2015 në Asamblenë e Përgjithshme të OKB-së të kësaj jave, duke reduktuar perspektivat e rikthimit të naftës iraniane në tregun ndërkombëtar. Grupi i prodhuesve OPEC+, Organizata e Vendeve Eksportuese të Naftës dhe shoqëruesit përfshirë Rusinë, po furnizon tregun me 3.58 milionë fuçi në ditë më pak se objektivat e saj të prodhimit, ose rreth 3.5% të kërkesës globale. Investitorët këtë javë janë duke u përgatitur për një tjetër rritje agresive të normës së interesit nga Rezerva Federale e SHBA-së, për të cilën kanë frikë se mund të çojë në recesion dhe rënie të kërkesës për karburant.

Fed pritet të rrisë normat me 75 pikë bazë për të tretën herë radhazi në përpjekjen e saj për të frenuar inflacionin. Ndërkohë, rezervat e naftës së papërpunuar dhe të karburantit në SHBA u rritën me rreth 1 milion fuçi për javën e mbyllur më 16 shtator.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.