“Çmimet s’kanë prekur ende kulmin, do rriten akoma” – Parashikime të zymta të BSH për inflacionin, do nisë rënien vetëm në 2023, normalizimi në 2024

Ndërsa 3 muajt e parë të vitit kanë shënuar një rritje çmimesh përtej parashikimeve, edhe më pesimiste janë pritshmëritë e Bankës së Shqipërisë për muajt e tjerë të vitit. Ajo parashikon rritje të çmimeve përgjatë gjithë vitit 202, tendencë që pritet të ndryshoje vetëm vitin e ardhshëm, ndërkohë që kthimin e normës së inflacionit në vlerat normale do ta shohim vetëm në vitin 2024.

Parashikimi vjen përmes Raportit Tremujor të Politikave Monetare të sapo publikuar nga Banka e Shqipërisë.

Shkak, sipas Bankës së Shqëiprisë, është bërë Konflikti Rusi-Ukrainë, i cili po ndikon negativisht ekonominë botërore përmes rritjes së çmimeve, pengesave në furnizim dhe rritjes së pasigurisë. Deri më tani, ndikimi më i dukshëm i tij ka qenë tek çmimet e lëndëve të para, të cilat kanë arritur kulme të reja shumëvjeçare, në reflektim të rolit të rëndësishëm të Rusisë dhe Ukrainës si prodhues të lëndëve djegëse, grurit dhe vajrave bimore.

Inflacioni u rrit në 4.4% në tremujorin e parë, duke kërcyer nga 3.7% në muajin janar, në 5.7% në muajin mars. Një rritje e shpejtë u vërejt tek çmimet e ushqimeve dhe të naftës, të ndikuara kryesisht nga rritja e fortë e këtyre çmimeve në tregjet botërore.

Presionet për rritjen e çmimeve po zgjerohen, ndërsa rritja e kostove të lëndëve energjetike po përcillet edhe tek çmimet e sektorëve të tjerë, nënvizon në raport Banka e Shqipërisë.

Inflacioni parashikohet të përshpejtohet në vitin 2022 dhe të vijë në rënie gjatë vitit 2023., parashikon Banka e Shqipërisë në Raport Në afatin e shkurtër, presionet inflacioniste pritet të nxiten si nga faktorë të brendshëm – rritja e kërkesës, punësimit e pagave – ashtu edhe nga faktorë të jashtëm – çmimet e larta në tregjet globale. “Më tej, nën supozimin e gjetjes së një zgjidhjeje për konfliktin, tensionet në tregjet ndërkombëtare pritet të qetësohen duke lehtësuar presionet mbi inflacion.

Ky i fundit parashikohet të kthehet në objektiv, duke nisur nga fillimi i vitit 2024”, thekson në raport Banka e Shqipërisë.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.