Çmimi i naftës ulet me mbi 2 dollarë – Ndikojnë shqetësimet në tregun bankar dhe vendimmarrja e FED

Çmimet e naftës ranë të hënën në nivelin më të ulët në 15 muajt e fundit për shkak të shqetësimeve se rreziqet në sektorin bankar botëror mund të shkaktojnë një recesion që do të çonte në rënien e kërkesës për karburant. Gjithashtu tregjet janë në pritje të vendimmarrjes së Rezervës Federale të SHBA, me një një rritje të mundshme të normave të interesit këtë javë.

Kontratat e së ardhmes së naftës së papërpunuar Brent ranë 2,32 dollarë, në 70,65 dollarë për fuçi, ndërsa nafta e papërpunuar e Teksasit Perëndimor u tregtua me 64,59 dollarë për fuçi, me një rënie prej 2,15 dollarë.

Rënia e çmimit të naftës vjen pavarësisht marrëveshjes historike, sipas së cilës UBS, banka më e madhe e Zvicrës, do të blejë kreditorin numër 2 të vendit Credit Suisse në një përpjekje për të ndaluar përhapjen e një krize bankare.

Pas njoftimit, Rezerva Federale e SHBA, Banka Qendrore Europiane dhe banka të tjera qendrore të mëdha u zotuan të rrisin likuiditetin e tregut dhe të mbështesin bankat e tjera.

Takimi i ardhshëm i OPEC-ut është një tjetër katalizator i mundshëm në perspektivën e tregut. Rreziku i mëtejshëm i rënies së çmimeve rrit mundësinë që OPEC të reduktojë më tej prodhimin për të mbështetur çmimet.

Disa investitorë po i bëjnë thirrje Rezervës Federale të ndalojë shtrëngimin e politikës monetare për momentin, por të jetë gati të rifillojë rritjen e normave më vonë. Një ngadalësim i rritjes së normave të interesit mund të dobësojë monedhën e gjelbër, duke i bërë mallrat e tregtuara në dollarë si nafta e papërpunuar, më të përballueshme për mbajtësit e monedhave të tjera.

Nga ana tjetër, Goldman Sachs uli parashikimet e saj për naftën e papërpunuar Brent. Banka e investimeve tani pret që Brent të arrijë mesatarisht 94 dollarë për fuçi në 12 muajt e ardhshëm dhe 97 dollarë në gjysmën e dytë të 2024, nga 100 dollarë që parashikohej më pare çmimi.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.