Dobësimi i dollarit rrit metalet e çmuara – FED mund të nisë uljen e interesave në maj të 2024

Ari po qëndron në rritje edhe në sesionin e sotëm dhe po mbështetet nga dobësimi i dollarit amerikan dhe i yield-eve të obligacioneve të Thesarit, për shkak se inflacioni u ngadalësua më shumë se parashikimet e analistëve. Të dhënat kanë shtuar pritshmëritë se Rezerva Federale mund t’i ketë dhënë fund ciklit të shtrëngimit të politikës monetare. Kontrata “spot” e arit po qëndron në rreth 1975 dollarë për onz, ndërsa në sesionin e kaluar u rrit me rreth 1%.

Kontrata “futures” po tregtohet në rreth 1980 dollarë për onz. Analistët shprehen se sesionin e djeshëm u krijua skenari perfekt për arin, për shkak të një rënie të mprehtë të dollarit dhe të yield-eve të obligacioneve. Gjithashtu, tregu duket se është në procesin e faktorizimit të rrezikut se lufta mes Izraelit dhe Hamasit mund të zgjerohet edhe në vende të tjera.

Ngadalësimi i inflacionit të SHBA bëri që indeksi i dollari amerikan të bjerë në nivelin më të ulët në më shumë se 2 muaj, përballë shportës me monedhat kryesore ndërkombëtare, duke e bërë arin më të lirë për zotëruesit e monedhave të tjera.

Pas publikimi të të dhënave mbi inflacionin të martën, analistët vlerësojnë 65% mundësi që Rezerva Federale të ulë normën bazë të interesit në maj të vitit të ardhshëm. Të hënën ky probabilitet qëndronte në 34%. Normat më të ulëta të interesit në SHBA rrisin kërkesën e investitorëve për metalin e çmuar.

Tashmë, tregjet po presin të dhënat mbi shitjet me pakicë dhe indeksin e çmimeve të prodhimit në SHBA, që do të japin më shumë qartësi mbi perspektivën e normave të interesit. Ndër metalet e tjera, argjendi po tregtohet në rreth 23.5 dollarë për onz, ndërsa platini po tregtohet në rreth 890 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.