Doganat trefishojnë gjobat për bizneset në shkelje – 1.4 milionë euro penalitete për shmangie të detyrimeve

Drejtoria e Përgjithshme e Doganave ka rritur vlerën e sanksioneve administrative të vendosura ndaj bizneseve gjatë vitit 2023. Referuar të dhënave zyrtare të publikuara në Librin Jeshil, vitin që lamë pas janë propozuar masa administrative në shumën 136,4 milionë lekëve apo rreth 1.4 milionë euro, ndërsa në vitin 2022 penalitetet regjistrohen në shumën e vetëm 5,9 milionë lekëve.

Gjatë vitit 2023, Drejtoria e Kontrollit pas Zhdoganimit në Departamentin Operativ Hetimor ka përgatitur 25 programe kontrolli aposteriori si dhe ka vijuar me procedurat e 2 programeve kontrolli të hartuara gjatë vitit 2022, gjithsej 27 programe kontrolli, krahasuar me 34 të ushtruara gjatë vitit 2022.

Sipas doganave numri më i ulët i kontrolleve ka ardhur si shkak i ristrukturimit të Drejtorisë së Kontrollit pas Zhdoganimit, po pavarësisht numrit më të reduktuar shkeljet duket se kanë qenë më të larta.

Konkretisht, në fushën e Regjimit të Përpunimit Aktiv janë hartuar 15 Programe Kontrolli nga të cilat 8 rezultuan me shkelje e për pasojë janë evidentuar detyrime doganore të shmangura dhe penalitete për kundravajtje administrative. Detyrimet doganore të shmangura vlerësohen në afro   27 milionë lekë, dhe penalitetet e vendosura arrijnë vlerën e 83 milionë lekëve.

Në fushën e Regjimit të Lejimit të Përkohshëm janë hartuar 4 Programe Kontrolli nga të cilat 1 rezultoi me shkelje e për pasojë detyrimi doganor i shmangur është 24,4 milionë lekë dhe masat administrative regjistrohen në 48.4 milionë lekë.

Po ashtu, u hartuan 3 programe kontrolli për vlerësimin doganor nga ku rezultuan detyrimet doganore të shmangura 16 milionë lekë dhe u vendosën penalitetet në vlerën 3,6 milionë lekë.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.