Dollari forcohet lehtë – FED do të mbajë norma të larta interesi për një kohë më të gjatë
Dollari amerikan është forcuar lehtë në sesionin e sotëm, për shkak të parashikimeve se normat e interesit në SHBA do të qëndrojnë të larta për një kohë më të gjatë. Gjithashtu, investitorët janë të fokusuar te bisedimet për rritjen e tavanit të borxhit në Shtetet e Bashkuara. Një zyrtar i lartë i Rezervës Federale deklaroi se norma bazë e interesit duhet të shkojë në 6%, në mënyrë që inflacioni të shkojë brenda objektivit prej 2%.
Tashmë, investitorët po vlerësojnë 26% mundësi që rezerva Federale të rrisë edhe me 25 pikë përqindje normën bazë të interesit në takimin e muajit të ardhshëm. Euro vijon të tregtohet pranë 1.08 dollarëve dhe gjatë këtij muaji ka humbur rreth 2% të vlerës. Paundi britanik po këmbehet me rreth 1.2440 dollarë. Për sa i përket bisedimeve të borxhit, presidenti amerikan, Joe Biden dhe spikeri i Dhomës së Përfaqësuesve, Kevin McCarthy i përfunduan diskutimet e së hënës pa një marrëveshje.
Palët kanë edhe 10 ditë kohë, për të shmangur një falimentim të ekonomisë amerikane. Në tregun e kriptomonedhave, bitcoin po tregtohet në rreth 27,300 dollarë, ndërsa ethereum po tregtohet në rreth 1855 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.