Dollari kthen pjesërisht fitimet – Të enjten rritet me mbi 0.8%, mbështetet nga inflacioni

Dollari amerikan po qëndron në rënie të lehtë në sesionin e sotëm, një ditë pasi realizoi fitimet më të mëdha që nga marsi i këtij viti. Rritja e inflacionit më shumë se parashikimet e analistëve, ka rikthyer shqetësimet se Rezerva Federale mund të rrisë normën bazë të interesit në muajin dhjetor.

Indeksi i Çmimeve Konsumatore u rrit me 0.4% me bazë mujore dhe me 3.7% me bazë vjetore. Analistët parashikonin një rritje me 0.3% dhe 3.6% respektivisht. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare, po qëndron në rreth 106.3, ndërsa në sesionin e kaluar u rrit me 0.8%, fitimet më të mëdha ditore që nga 15 marsi.

Rritja e dollarit bëri që jeni të bjerë drejt nivelit sensitiv prej 150, që mund ti detyrojë autoritetet të ndërhyjnë për të stabilizuar monedhën. Ndërkohë, euro ka fituar rreth 0.2% të vlerës dhe po tregtohet në rreth 1.055 dollarë.

Investitorët i kanë mirëpritur të dhënat mbi çmimet e prodhimit dhe të konsumit të Kinë, që treguan se presionet deflacioniste ishin më të mëdha se parashikimet. Ndërsa të dhënat mbi tregtinë treguan se eksportet dhe importet ranë me një hap të ngadaltë për të dytin muaj me radhë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.