Dollari, në nivelin më të lartë në 3 muaj – Mbështetet nga komentet e Powell për të rritur interesat

Dollari amerikan po tregtohet i qëndrueshëm në sesionin e sotëm, pranë nivelit më të lartë në 3 muajt e fundit, pas mesazheve të shefit të Rezervës Federale, Jerome Powell, i cili tha se normat e interesit do të jenë më të larta. Në ditën e dytë të dëshmisë së tij përpara ligjvënësve në Kongresin amerikan, Poëell e rikonfirmoi këtë mesazh, por bëri një qasje më të kujdesshme në lidhje me debatin mbi masën e rritjes së interesave.

Si rezultat i këtyre komenteve, indeksi që mat ecurinë e dollarit amerikan, përballë shportës me 6 monedhat kryesore ndërkombëtare, po qëndron në rreth 105.6, niveli më i lartë në 3 muajt e fundit. Në anën tjetër, euro po qëndron në rreth 1.054 dollarë, ndërsa paundi në rreth 1.18 dollarë. Të martën, në ditën e parë të dëshmisë së Powell në kongres, dollari u rrit me 1.3%, fitimet më të mëdha ditore që nga shtatori i vitit të kaluar. Të dhënat pozitive mbi ekonominë amerikane, të publikuara më herët gjatë javës i kanë dhënë më shumë hapësira bankës qendrore për të shtrënguar politikat monetare.

Tashmë, tregtarët po vlerësojnë se ka 70% mundësi që Rezerva Federale të rrisë me 50 pikë bazë, normën e interesit në takimin e 21 dhe 22 marsit. Në anën tjetër, Banka Qendrore e Kanadasë e mbajti normën 1-ditore të interesit të pandryshuar në 4.5%, duke u bërë banka e parë e madhe që pezullon fushatën e rritjes së interesave. Në tregun e kriptomonedhave, bitcoin po tregtohet në rreth 21,600 dollarë, ndërsa ethereum po tregtohet në rreth 1540 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.