Nafta, e qëndrueshme pranë 82 USD – Investitorët, të shqetësuar për ngadalësimin e kërkesës

Nafta po vijon të gjendet nën presion edhe në sesionin e sotëm, pasi të dhënat e publikuara në SHBA treguan se rezervat ju rikthyen rënies gjatë javës së kaluar. Edhe pritshmëritë për norma më të larta interesi në Shtetet e Bashkuara po ushtrojnë presion mbi çmimet. Nafta Brent e Londrës po tregtohet në rreth 82.5 dollarë për fuçi, ndërsa nafta Bruto amerikane po tregtohet në rreth 76.5 dollarë për fuçi.

Të dyja kontratat kanë rënë me mbi 3% në dy sesionet e fundit, humbjet më të mëdha që nga fillimi i vitit, pas komenteve të shefit të Rezervës Federale, Jerome Powell për rritjen e interesave. Referuar të dhënave të Institutit Amerikan të Naftës, rezervat e naftës bruto ranë me 1.7 milionë fuçi, gjatë javës së kaluar, për herë të parë në 10 javët e fundit. Analistët parashikonin një rritje me rreth 400 mijë fuçi. Megjithatë, tregjet po presin të dhënat zyrtare që publikohen në vonë gjatë ditës së sotme nga Administrata për Informimin mbi Energjinë.

Paralelisht, ministrat e naftës të vendeve prodhuese vijojnë të debatojnë në lidhje me tkurrjen e furnizimit të tregut, në një konferencë që po zhvillohet në Houston të Shteteve të Bashkuara. Debati vjen pas vendimit të Rusisë për të ulur eksportet drejt vendeve europiane me 500 mijë fuçi, gjatë muajit mars.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.