Dollari zbret në nivelin më të ulët në 1 vit – Shtohen mundësitë që Rezerva Federale të mos rrisë normën bazë të interesit

Dollari amerikan po qëndron në nivelin më të ulët në një vit edhe në sesionin e sotëm, përballë shportës me 6 monedhat kryesore ndërkombëtare, pasi janë rritur mundësitë që Rezerva Federale të mos rrisë normën bazë të interesit.

Sipas të dhënave të publikuara nga Departamenti i Punës në SHBA, Indeksi i Çmimeve të Prodhimit ra në nivelin më të ulët në 3 vitet e fundit, gjatë marsit. Edhe të dhënat mbi inflacionin më herët gjatë javës, treguan një ngadalësim të ndjeshëm të rritjes së çmimeve.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 100.7, niveli më i ulët në rreth 1 vit. Në mbyllje të sesionit të sotëm, dollari pritet të publikojë humbje javore prej mbi 1%, rënia më e madhe që nga janari i këtij viti.

Njëkohësisht, edhe paundi britanik është rritur në nivelin më të lartë në 10 muajt e fundit dhe po tregtohet në rreth 1.2545 dollarë. Në tregun e kriptomonedhave, bitcoin po tregtohet pranë 31 mijë dollarëve, ndërsa ethereum po tregtohet në rreth 2110 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.