Dollari zbret në nivelin më të ulët në 2 javë – Zyrtarët e FED sinjalizojnë se normat e interesit nuk do të ndryshojnë

Dollari amerikan po qëndron në rënie të lehtë në sesionin e sotëm, përballë shportës me 6 monedhat kryesore ndërkombëtare, pasi investitorët po presin të dhënat mbi inflacionin në SHBA, që do të publikohen më vonë gjatë ditës së sotme.

Tregjet po presin edhe procesverbalin e takimit të shtatorit të Rezervës Federale, që do të publikohet po sot. Yield-i i obligacioneve 10-vjeçare amerikane vijon tendencën në rënie, duke e rrëzuar dollarin pranë nivelit më të ulët në 2 javët e fundit, pasi investitorët i kanë mirëpritur komentet e zyrtarëve të Rezervës Federale, se normat e interesit nuk do të rriten.

Tregjet janë të fokusuara edhe te konflikti mes Izraelit dhe Grupit Palestinez të Hamasit, me luftimet që kanë hyrë në ditën e pestë. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 105.8, pranë nivelit më të ulët në 2 javët e fundit. Ndërkohë, paundi po qëndron pranë 1.23 dollarëve dhe euro po tregtohet në rreth 1.06 dollarë.

Sipas një sondazhi të realizuar nga Banka Qendrore Europiane, familjet në Eurozonë presin që inflacioni të qëndrojë lehtë mbi objektivin prej 2%, gjatë tre viteve në vijim, në një kohë që politikëbërësit po përpiqen të bindin publikun se politikat e tyre për të zbutur çmimet janë në rrugën e duhur.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.