“Ekonomia e Kosovës, më e fortë” – Kryeministri Albin Kurti: Gjatë vitit 2023 u mbështetën 218 biznese

Ekonomia e Kosovës nuk ka qenë asnjëherë më e fortë se tani. Deklarata u bë nga kryeministri i vendit, Albin Kurti, gjatë konferencës vjetore “Strategjia për Zhvillim Industrial dhe Instrumentet Mbështetëse për Bizneset” të organizuar nga Ministria e Industrisë.

Kreu i ekzekutivit theksoi përkushtimin për krijimin e një mjedisi të favorshëm për biznesin, që do ta bënte Kosovën destinacion më tërheqës.

“Vizioni ynë i politikës industriale është ai i një industrie më të integruar globalisht. Me politikat tona zhvillimore po e rrisim ekonominë e vendit dhe po mbështesim qytetarët, bizneset dhe ndërmarrësit. Qeveria ka mbështetur Fondin Kosovar për garanci kreditore ku kanë përfituar bizneset”.

Në kuadër të Pakos për Ringjallje Ekonomike, ai tha se janë mbështetur 218 biznese brenda këtë viti.

“Nivelin e punësimit e rritëm përmes subvencionimit të bizneseve. Ndërkaq, me ndihmën e mërgatës tonë kemi bërë ndërlidhjen e tregut të punës me arsimin profesional. Lidhja midis tregut të punës dhe arsimit profesional është jetik për shoqërinë. Ndërsa, rritjen ekonomike e kemi shpërndarë te qytetarët”.

Kreu i qeverisë shtoi se do të vazhdojë ndihma në mbështetje të zhvillimit, rritjes dhe fitimit në sektorin privat.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.