Nëntori e festat shtuan paratë në qarkullim jashtë bankave – 30 milionë euro më shumë se tetori. Rikthehen flukset rekord të pikut të sezonit turistik

Pas një rënie të lehtë në tetor, paraja në qarkullim jashtë sistemit bankar i është rikthyer ritmeve të larta të rritjes gjatë nëntorit, duke ju afruar vlerave rekord të shënuara gjatë pikut të sezonit turistik. Sipas të dhënave zyrtare të Bankës së Shqipërisë, nga 405,5 miliardë lekë në tetor, totali i parave në qarkullim rezultoi 408,6 në fund të nëndorit, me një rritje prej më shumë se 3 miliardë lekësh apo afërisht 30 milionë eurosh. Vlerat e nëntorit ju afruan ndjeshëm niveleve rekord të regjistruara gjatë muajve korrik-gusht, kur totali i parave jashtë kanaleve zyrtare ishte mbi 410 miliardë lekë.

Rritja e parave në Qarkullim vjen në një moment kur ka shënuar rënie për të dytin muaj radhazi treguesi tjetër i rëndësishëm, ai i mjeteve valutore neto, i cili kishte shënuar gjithashtu vlera rekord në verë, për shkak të eurobondit prej 600 milionë eurosh të emetuar nga Qeveria në qershor të këtij viti. Nga shtatori, kur totali i mjeteve valuote arriti në vlerën 587,2 miliardë lekë, treguesi ra në përkatësisht 573,5 miliardë lekë dhe 541,9 miliardë në tetor dhe nëntor.

Ndërkaq, vlerat e parave jashtë bankave janë shumë më të larta krahasuar me vitet e mëparshëm. Në janarin e vitit 2022, totali i parave që qarkullonin jashtë bankave ishte pak më shumë se 376 miliardë lekë, thuajse 25 miliardë lekë, apo rreth 340 milionë euro më pak nga sa qarkullojnë aktualisht. Ky tregues ka ardhur në rritje përgjatë gjithë vitit të shkuar për të kulmuar në fund të tij në mbi 400 miliardë lekë.

Në raport me paranë gjithsej, jashtë sistemit bankar qarkullonte në fund të dhjetorit të vitit 2019, 23.6% e totalit. Paraja jashtë bankave ka pasur tendencë rritëse të vazhdueshme duke pasqyruar edhe nivelin e lartë të informalitetit të ekonomisë shqiptare.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.