Ekskluzive/ Shqipëria përzgjidhet nga NATO për certifikimin e avionëve të saj!

Shqipëria ka arritur të fitojë të drejtën që të certifikojë avionët e NATO-s. I ftuar në emisionin ‘Insider’ me gazetarin Angelo Haruni, Drejtori Ekzekutiv i Autoritetit të Aviacionit Civil, Maksim Ethemaj e cilësoi si një sukses të përbashkët të Ministrisë së Mbrojtjes së Shqipërisë dhe Autoritetit të Aviacionit Civil shqiptar që vendi ynë është përzgjedhur që të ndihmojë NATO-n në certifikimin e avionëve të saj. Brenda 1 viti, vendi ynë do të marrë certifikatën për këtë shërbim.

“Ne ishin në Bruksel, në NATO ku ishte mbledhja e komitetit të aviacionit. Për shkak të luftës në Ukrainë, pajisjet e fluturuese të NATO-s janë shumë të angazhuara. Në aviacion ka një ligj civil dhe ushtarak që avioni duhet të jetë i sigurtë si pajisje, që do të thotë se pas çdo misioni apo fluturimi avioni futet në kontroll.

Duke qenë se ka shumë aktivitetet,NATO ka nevojë për mbështetje nga shtetet anëtare për të certifikuar avionët e saj që janë luftarakë dhe transporti. Një sukses i përbashkët i  Ministrisë së Mbrojtjes dhe Aviacionit Civil ishte që Shqipëria u përzgjodh pas një kriteri selektiv nga NATO.

Përkundrejt standarteve që plotëson Shqipëria në Organizatën Botërore të Aviacionit Civil, Shqipëria u përzgjodh si shtet që të ndihmojë NATO-n në certifikimin e avioneve të saj. Në nëntor të vitit tjetër, kemi auditin e parë nga NATO dhe brenda 1 viti në marrin certifikimin që ne jemi të autorizuar dhe njihemi nga NATO” deklaroi Ethemaj në SCAN.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.