Energjisë globale i duhet një transformim radikal – Shumë njerëz zgjedhin mes ngrënies, apo energjisë elektrike

Sistemi global i energjisë është i padrejtë ndaj konsumatorëve. Shumica e konsumatorëve janë në mëshirën e tregjeve të paqëndrueshme ndërkombëtare të karburanteve fosile. Ata janë të detyruar të mbështeten në energjinë ndotëse dhe të shtrenjtë të shpërndarë përmes rrjeteve joadekuate. Shumë njerëz në mbarë botën duhet të zgjedhin mes ngrënies apo energjisë elektrike.

Në të njëjtën kohë, gjigantët e karburanteve fosile po përparojnë. Vitin e kaluar pesë kompanitë më të mëdha perëndimore të naftës dhe gazit kishin një fitim të kombinuar prej 200 miliardë dollarësh.

Ekspertët kërkojnë një përmbysje të modelit tradicional që na bën të varur nga termocentralet e centralizuara me lëndë djegëse fosile. Konsumatori duhet të vihet në fokus, në mënyrë që njerëzit e zakonshëm nga marrës të zhvillohen në prodhues. Kriza globale e energjisë ka përshpejtuar ndjeshëm prodhimin me ndotje të ulët, megjithëse investimet në lëndët djegëse fosile vazhdojnë të rriten.

Viti 2022 regjistroi rritje të paprecedentë në faturat e energjisë elektrike për shkak të varësisë nga karburantet fosile dhe pushtimit të Ukrainës nga Rusia. Kjo ka çuar rreth 141 milionë njerëz në varfëri ekstreme. Tranzicioni në burimet e rinovueshme të energjisë konsiderohet një rrugë njëkahëshe nga Agjencia Ndërkombëtare e Energjisë. Inkurajimi i konsumatorëve për të instaluar sisteme të energjisë së pastër si panele diellore, bateri, matës inteligjentë dhe ngrohje e ftohje elektrike efikase në shtëpinë e tyre do të reduktonte apo edhe do t’i eliminonte faturat e tyre.

Në Europë, vetëm kalimi në pompat inteligjente të nxehtësisë do të reduktojë kostot e ngrohjes së konsumatorëve deri në 25% në krahasim me gazin natyror. Në zonat rurale të Afrikës Sub-Sahariane, instalimi i një drite të thjeshtë diellore rrugore shkakton një ulje të kostove të ndriçimit të konsumatorit me 85%.

Ndërsa kalojmë në epokën e elektrifikimit masiv, ky ndryshim është i nevojshëm. Është e nevojshme që konsumatorët të jenë në gjendje të gjenerojnë energjinë e tyre në mënyrë që rrjetet e energjisë elektrike të jenë në gjendje t’i përgjigjen kërkesës, e cila momentalisht është e paprecedentë.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.