Kina ndërton një qendër nënujore të dhënash – Me fuqinë e 6 milionë kompjuterëve. Do të kursehen 122 milionë kilovatorë energji

Kina po ndërton qendra të mëdha të dhënash nën ujë, me të cilat planifikon të kursejë 122 milionë kilovat orë energji elektrike dhe hapësira sa pothuajse 10 fusha futbolli.

Qendrat e të dhënave nënujore nuk janë një risi. Microsoft i vendosi ato në thellësitë e oqeanit në vitin 2014 me sistemin e tij Project Natick. Tani Kina ka filluar ndërtimin e qendrës më të madhe tregtare në botë të të dhënave nënujore, në brigjet e qytetit të Sanya.

Secili nga elementët e qendrës së të dhënave thuhet se mund të përpunojë mbi katër milionë foto me rezolucion të lartë në 30 sekonda, që përfaqëson performancën e vlerësuar të rreth 60 mijë sistemeve standarde të kompjuterëve desktop që punojnë së bashku.

Plani është instalimi i 100 elementeve të qendrës së të dhënave të papërshkueshëm nga uji në kuadrin e sistemit nënujor të lartpërmendur dhe vlerësohet se ata do të jenë në gjendje të përpunojnë 400 milionë foto HD në sekondë, me fuqinë e gjashtë milionë pajisjeve PC.

Secila prej qendrave të të dhënave është e madhe: deri në 68 mijë metra katrorë në madhësi, që është e barabartë me rreth 10 fusha futbolli. Do të duhen rreth tre orë për të lëvizur çdo qendër të dhënash 35 metra nën sipërfaqen e oqeanit.

Kina planifikon të kursejë 122 milionë kilovat orë energji elektrike dhe më shumë se 105 mijë ton ujë të freskët me këtë sistem. Arsyeja është se uji i ftohtë i kripur do të jetë në gjendje të mbajë të freskët çipat e qendrës së të dhënave.

Qendrat e të dhënave do të operohen nga Beijing Sinnet, një ofrues kryesor i qendrave të të dhënave dhe shërbimeve ‘cloud’ në Kinë. I gjithë projekti kushton rreth 879 milionë dollarë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.