Ibrahimaj: Investimi i “Lutech” konfirmon potencialin e Shqipërisë si qendër e inovacionit dhe teknologjisë në rajon
Ministrja e Ekonomisë dhe Inovacionit, Delina Ibrahimaj, mori pjesë në ceremoninë e inaugurimit të selisë së re të kompanisë “Lutech” në Shqipëri, në prani të përfaqësuesve të kompanisë, Ambasadorit të Italisë në Shqipëri dhe të ftuarve të tjerë.
Gjatë fjalës së saj, ministrja Ibrahimaj vlerësoi investimin e Lutech si një dëshmi konkrete të transformimit që po kalon ekonomia shqiptare dhe të besimit në rritje që kompanitë ndërkombëtare po tregojnë ndaj potencialit të vendit.
“Vendimi i Lutech për të zgjeruar praninë e saj në Shqipëri dhe për të investuar në fusha strategjike si Inteligjenca Artificiale, Analiza e të Dhënave, Cloud Computing dhe Transformimi Digjital është një votë e fortë besimi për talentin shqiptar dhe për perspektivën e ekonomisë sonë”, u shpreh Ibrahimaj.
Ministrja theksoi se Shqipëria po tërheq gjithnjë e më shumë investime me vlerë të shtuar të lartë, të mbështetura mbi kapitalin njerëzor, aftësitë profesionale dhe potencialin e të rinjve shqiptarë.
Ajo vuri në dukje se mbi 250 profesionistë shqiptarë janë tashmë pjesë e Qendrës Globale të Kompetencës së Lutech në Tiranë, duke kontribuar në projekte komplekse dhe inovative për tregjet evropiane dhe globale.
“Zhvillimi i kapitalit njerëzor mbetet një nga prioritetet tona kryesore. Investimet në arsimin profesional, aftësitë digjitale dhe lidhjen mes universiteteve dhe tregut të punës janë thelbësore për të ndërtuar një ekonomi konkurruese dhe të orientuar drejt inovacionit”, tha ministrja.
Duke vlerësuar fokusin e kompanisë në Inteligjencën Artificiale dhe teknologjitë e avancuara, Ibrahimaj theksoi se Shqipëria synon të jetë një pjesëmarrëse aktive në transformimin digjital global dhe se partneritete të tilla përshpejtojnë këtë proces.
Ministrja mirëpriti gjithashtu përfshirjen e “Lutech” në ekosistemin e Durana Tech Park, duke e cilësuar atë si një hap të rëndësishëm për krijimin e një qendre rajonale të inovacionit, kërkimit dhe teknologjisë.
Ibrahimaj nënvizoi se ky investim përfaqëson një kapitull të ri në marrëdhëniet ekonomike mes Shqipërisë dhe Italisë, të bazuar gjithnjë e më shumë te teknologjia, inovacioni dhe ekonomia digjitale.
“Shqipëria mbetet e hapur ndaj investimeve që sjellin dije, teknologji, punësim të kualifikuar dhe vlerë afatgjatë. Ambicia jonë është të ndërtojmë një ekonomi moderne, inovative dhe plotësisht të integruar në hapësirën ekonomike evropiane”, përfundoi ministrja Ibrahimaj.
Marco Alberti, Ambasador i Italisë në Shqipëri, deklaroi se “detyra e një ambasade është të promovojë më të mirën e vendit të saj jashtë kufijve, për të krijuar vlerë. Kjo është ajo që po bëjmë. Hapja e selisë së re të Lutech në Tiranë është një shenjë e prekshme e partneritetit të ri strategjik mes Italisë dhe Shqipërisë. Një kompani në rritje të shpejtë, në një sektor kyç për zhvillimin e vendit”.
Giuseppe Di Franco, CEO i Grupit Lutech, than w fjalwn e tij se "hapja e selisë së Tiranës përfaqëson një hap të mëtejshëm në ndërtimin e Lutech si një aktor evropian në fushën e teknologjisë digjitale dhe Inteligjencës Artificiale. Të rritesh nuk do të thotë vetëm të zgjerosh praninë ndërkombëtare, por mbi të gjitha të lidhësh talentet dhe kompetencat për të krijuar vlerë për klientët tanë. Me Global Competence Center synojmë të forcojmë një model që kombinon afërsinë me tregjet dhe kapacitetin e ofrimit të shërbimeve në shkallë globale”.
Gianluca Ciminata, CEO i Lutech Balkans dhe drejtues i Global Competence Center të Lutech, theksoi se “inaugurimi i selisë së re në Tiranë përfaqëson një moment kyç në rrugëtimin tonë të rritjes ndërkombëtare. Përmes Global Competence Center synojmë të krijojmë një mjedis dinamik dhe të hapur, të integruar ngushtë me qendrën e Kërkimit dhe Zhvillimit, ku njerëzit mund të forcojnë kompetencat e tyre dhe të kontribuojnë në projekte inovative për tregjet globale."
Zgjedhja e Shqipërisë konfirmon strategjinë e Lutech për të investuar në territore me zhvillim të shpejtë teknologjik, për të vlerësuar talentet vendase dhe për të kontribuar në ndërtimin e ekosistemeve inovative.
Në këtë kontekst, selia e re synon të bëhet edhe një pikë takimi mes kompanisë, universiteteve dhe profesionistëve të rinj, duke nxitur zhvillimin e aftësive dhe krijimin e mundësive të reja të karrierës.
Me Tiranën, Lutech zgjeron praninë e tij gjeografike dhe forcon një model zhvillimi që e sheh Evropën si një sistem të integruar kompetencash, inovacioni dhe talentesh.
-Profili i Grupit Lutech
Grupi Lutech, lider në Itali dhe një nga aktorët kryesorë evropianë në fushën e teknologjisë digjitale dhe Inteligjencës Artificiale, projekton, zhvillon dhe menaxhon zgjidhje për transformimin digjital, inovacionin dhe rritjen e kompanive dhe institucioneve, falë njohjes së thellë të proceseve specifike të industrive të ndryshme.
Me 6,000 profesionistë dhe një volum biznesi prej 1 miliard eurosh, Grupi Lutech udhëheq ndryshimin përmes një modeli që kombinon konsulencën strategjike, zbatimin dhe qeverisjen, duke maksimizuar rezultatet për klientët e tij dhe duke ofruar një paketë të plotë dhe të integruar shërbimesh.
Lutech zgjeron dhe përditëson vazhdimisht portofolin e zgjidhjeve dhe shërbimeve të tij përmes blerjeve strategjike dhe investimeve të vazhdueshme në njerëz, platforma dhe tregje të reja gjeografike.
Samiti BE-Ballkani Perëndimor në Tivat - Liderët diskutojnë zgjerimin e BE-së, sigurinë rajonale, Planin e Rritjes Ekonomike
Po mbahet në Tivat të Malit të Zi, samiti i radhës midis BE dhe Ballkanit Perëndimor. Tema e samitit është “Mirëqenia dhe stabiliteti i përbashkët i BE-së......
Bypass-i i Tiranës, gati tenderi për fazën III - ARRSH: Punimet në dy lotet e para kanë arritur në rreth 20%
Autoriteti Rrugor Shqiptar ka bërë gati procedurën për tenderimin e fazës së tretë të bypass-it të Tiranës, një prej projekteve më të rëndësishme......
Nga “Doctor Google”, tek IA - Si ndikon teknologjia në shëndetësi? Dika: Sfiduese
Nga “Doctor Google”, ku shpesh qytetarët arrinin në diagnozë të gabuar duke iu referuar informacioneve në internet, tashmë qasja ka ndryshuar dhe për këtë një......
Shqiptarët paguan 39 mln euro për rivlerësimin e pronave - Malaj: Shifra vetëm për dy muaj. Pritshmëria shumë e lartë
Vetëm në dy muaj, buxheti i shtetit ka arkëtuar rreth 3.9 miliardë lekë nga procesi i rivlerësimit të pasurive të paluajtshme, që nga nisja e zbatimit në......
Mallrat e importit, më të lira në fillim të vitit/ Indeksi i shënoi rënie me 0.2% krahasuar me një vit më parë
Çmimet e produkteve të importuara në Shqipëri kanë shënuar një rënie të lehtë gjatë tremujorit të parë të vitit 2026, duke reflektuar një zbutje të kostove......
Indeksimi i pensioneve, kur do të nisë? - Malaj: Po shqyrtojmë mundësinë që ta afrojmë në qershor-korrik
Indeksimi i pensioneve mund të bëhet brenda muajve qershor-korrik, duke mos pritur muajin Tetor sikurse është e përcaktuar në ligj. Ministri i Financave,......
Sot, afati i fundit i aplikimeve për Paqen Fiskale - Procedura zhvillohet online përmes sistemit “e-filing”
Sot është dita e fundit që tatimpaguesit të plotësojnë kushtet ligjore dhe të aplikojnë për lidhjen e marrëveshjes së Paqes Fiskale, një procedurë që......
Java mbyllet negativisht për valutat e huaja – Dobësohen ndjeshëm Euro, Franga dhe Paundi
Dollari amerikan e ka mbyllur këtë javë në qëndrueshmëri duke mos pësuar luhatje të ndjeshme të kuotës në raport me një ditë më parë teksa është blerë këtë......
