Ergys Verdho në krye të “Hekurudha Shqiptare”, Erlind Sulo drejtor i KESH

Hekurudha Shqiptare dhe KESH do të këne në krye drejtues të rinj. Ergys Verdho ka marrë emërimin si drejtor i përgjithshëm i Hekurudhës Shqiptare. Lajmi është konfirmuar nga burime zyrtare të Ministrisë së Infrastrukturës dhe Energjisë. Verdho që më parë ka qenë drejtor i Autoritetit Rrugor Shqiptar dhe më pas në qershor 2021 u emerua në krye të KESH, ku ka qëndruar deri në javët e fundit. Gjatë drejtimit të KESH, Verdho u përball me krizën energjitike, gjatë së cilës u krijuan shumë vështirësi për sigurimin e energjisë elektrike.

Emërimi i Verdhos këtë detyrë vjen në një moment kur Hekurudha Shqiptare është futur në një proces rivitalizimi përmes krijimit të korridoreve të reja. Ndërkohë që është duke u ndërtuar linja Tiranë – Rinas – Durrës, pritet të fillojnë nga zbatimi edhe ndërtimi i disa linjave të tjera si Durrës – Rrogozhinë, pjesë e Korridorit 8, Rrogozhinë-Pogradec deri në kufi me Maqedoninë e Veriut dhe Vorë – Hani i Hotit.

Së fundmi Bashkimi Europian ka vendosur të financojë me rreth 368 milion euro ndërtimin e linjës hekurudhore Vorë -Hani i Hotit. Kjo linjë prej 120 kilometrash është e vetmja linjë hekurudhore që mundëson transport ndërkombëtar të mallrave dhe pasagjerëve të vendit me Malin e Zi.

Ashtu siç është deklaruar edhe më herët nga Zv.Kryeministrja Balluku e ardhmja e Hekurudhës Shqiptare duket shumë premtuese, veçanërisht me mbështetjen e plotë të Bashkimit Europian. Duke qenë se projektet për ndërtimin e linjave hekurudhore mbështeten me grante dhe financim nga institucionet financiare ndërkombëtare BERZh dhe BEI, të gjitha procedurat që nga prokurimi, zbatimi e mbikqyrja e investimeve realizohen sipas rregullave dhe nën mbikëqyrjen e këtyre institucioneve.

Ndërkohë pas dorëheqjes së Verdhos nga KESH Këshilli Mbikqyrës i Korporatës ka emëruar Erlind Sulon si drejtor të ri të përgjithshëm. Sulo është prezantuar këtë të mërkurë para stafit të KESH. Ai ka mbajtur postin e drejtorit të Parkut të Butrintit dhe për një periudhë të shkurtër kohore ka qenë drejtor ekzekutiv i Agjencisë Kombëtare të Burimeve Natyrore. Së fundmi Sulo ishte këshilltar në ministrinë e Infrastrukturës dhe Energjisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.