Euro, e qëndrueshme në nivelin më të ulët në 2 dekada – Siguria energjetike po dikton tregun e monedhave, Gjermania në deficit tregtar
Euro po shfaqet e qëndrueshme në sesionin e sotëm, pranë nivelit më të ulët që nga viti 2002, pasi rritja e kostove të energjisë dhe shtrëngimi i politikave monetare nga Banka Qendrore Europiane ka rikthyer shqetësimet për një recesion në Eurozonë.
Më herët gjatë tregtisë aziatike, indeksi që mat ecurinë e dollarit amerikan përballë gjashtë monedhave kryesore ndërkombëtare u rrit në rreth 107, ndërsa euro ra poshtë 1.02 dollarëve, niveli më i ulët në dy dekadat e fundit. Gjatë këtij viti, indeksi i dollarit ka fituar rreth 12% të vlerës, fitimet më të mëdha që nga viti 2014.
Forcimi i dollarit amerikan është mbështetur nga politika agresive e Rezervës Federale me rritjen e interesave dhe nga statusi si një parajsë e sigurtë. Tashmë, çështja e sigurisë energjetike po ndikon edhe tregun e monedhave. Shtetet e Bashkuara janë një eksportues neto i energjisë, ndërsa Gjermania po përballet me një deficit tregtar për herë të parë që nga viti 1991.
Njëkohësisht, euro ka prekur nivelin më të ulët që nga viti 2015 përballë frangës svicerane, kur Banka Kombëtare e Zvicrës hoqi tavanin e këmbimit. Në tregun e kriptomonedhave, bitcoin po tregtohet në mbi 20 mijë dollarë, ndërsa ethereum në rreth 1160 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.