Euro humb pikë përballë dollarit dhe frangës – Monedhat përfitojnë nga statusi i parajsave të sigurta për të investuar

Euro po tenton të rikuperojë një pjesë të humbjeve të sesionit të kaluar, përballë dollarit amerikan, që cilësohet si një parajsë e sigurtë. Gjatë sesionit të kaluar në Wall Street, monedha europiane humbi rreth 0.8% të vlerës, ndërsa gjatë kësaj jave ka rënë me rreth 2.7%.

Gjithashtu, euro ka prekur nivelin më të ulët në 7 vite e gjysëm në raport me frangën, duke ju drejtuar nivelit të paritetit. Edhe monedha zvicerane po përfiton nga statusi i parajsës së sigurtë dhe nga vendimi i Bankës Kombëtare të Zvicrës për të ulur normën bazë të interesit, rreth 2 javë më parë.

Duke folur në konferencën vjetore të Bankës Qendrore Europiane, që po zhvillohet në Sintra të Portugalisë, presidenti i Rezervës Federale, Jerome Powell, deklaroi se është shumë e rëndësishme që të ulet inflacioni, edhe nëse do të ketë panik ekonomik, komente të ngjashme me deklaratën e presidentes së BQE, Christine Lagarde.

Ndërkohë, inflacioni më i ulët në Gjermani për qershorit, krahasuar me majin, ka rikthyer shpresat se çmimet mund të kenë arritur pikun dhe tashmë do të fillojë tendenca në rënie. Në raport me jenin japonez, dollari amerikan ka prekur nivelin më të lartë në 24 vitet e fundit, prej 137, kryesisht për shkak të politikave monetare të kundërta që po ndjekin bankat qëndrore në SHBA dhe Japoni.

Në tregun e kriptomonedhave, bitcoin ka rënë poshtë 20 mijë dollarëve dhe është dëmtuar nga vendimi i Agjencisë së Letrave me Vlerë dhe Këmbimit Valutor në SHBA, që refuzoi një propozim për të listuar një fond “spot” të tregtuar në bitcoin nga kompania Grayscale, një ndër menaxherët më të mëdhenj të aseteve dixhitale në botë. Ndërsa Ethereum po tregtohet në rreth 1050 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.