Ngadalësimi i kërkesës rrëzon naftën – Nafta e përpunuar në Londër bie pranë 1180 dollarë për ton

Nafta po qëndron në rënie edhe në sesionin e sotëm, duke zgjeruar humbjet e një dite më parë. Tashmë, investitorët janë të shqetësuar për ngadalësimin e ekonomisë globale, që përkthehet në një kërkesë më të ulët për naftë. Megjithatë, shqetësimet që kanë të bëjnë me tkurrjen e ofertës në treg po kufizojnë humbjet.

Nafta Brent e Londrës për gushtin po tregtohet në rreth 115 dollarë për fuçi, ndërsa nafta Bruto amerikane po tregtohet në rreth 110 dollarë për fuçi.

Ndërkohë, nafta e përpunuar në bursën e Londrës ka vijuar tendencën në rënie edhe ditën e sotme dhe po tregtohet në rreth 1180 dollarë për ton. Referuar të dhënave zyrtare në SHBA, rezervat e naftës bruto ranë me 2.8 milionë fuçi, gjatë javës që u mbyll më 24 qershor, ndërsa analistët parashikonin një rënie me 569 mijë fuçi.

Njëkohësisht, edhe rafineritë e kanë rritur aktivitetin e prodhimit duke punuar me 95% të kapacitetit, niveli më i lartë në 4 vitet e fundit. Në anën tjetër, OPEC+, që përfshin edhe aleatët e tjerë me në krye Rusinë, nisi të mërkurën takimin 2-ditor, për të përcaktuar politikat e prodhimit në të ardhmen.

Dy burime të afërta me takimin, deklaruan për Reuters se ka pasur pak progres për të arritur një marrëveshje mbi rritjen e prodhimit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.