Euro i rikthehet rënies, e hëna nis me nënçmim – Monedha e përbashkët europiane, përsëri nën presion të fortë

Pas një ngritjeje të shkurtër disa ditore, monedha e përbashkët evropiane i është rithyer tendencës nënçmuese ndaj lekut. Fillimi i kësaj jave e gjeti përsëri euron në rënie të qëndrueshme, e cila kishte nisur që në fund të javës së shkuar. Sipas Bankës së Shqipërisë kursi mesatar i këmbimit ra në 102.8 lekë. Ajo blihej këtë të hënë me 102.2 lekë, dhe shitej me 103.4 lekë. Vetëm 3 ditë më parë ajo u ngjit në kuotën e 105.8 lekëve, pas një jave me rritje të qëndrueshme. Për t’u shënuar është se në korrik, euro jo vetëm është luhatur në kuota shumë të ulëta në tregun tonë financiar, por preku edhe vlerën më të ulët historike prej 100.4 lekësh.

Rritja e javës së shkuar ishte edhe paradoksale, duke qenë se ndodhi fare pak ditë larg nga piku i sezonit turistik, gjatë të cilit euro tradicionalisht zhvlerësohet në raport me lekun për shkak të flukseve të larta të monedhës europiane që sjellin në Shqipëri turistët e emigrantët.

Njohës të tregut financiar shqiptar thanë se disa subjekte kanë blerë euro në tregun e brendshëm duke pritur edhe momentet më të volitshme kur çmimi ishte shumë i ulët, dukë sjellë më pas edhe rritjen e përkohëshme të kursit të monedhës së përbashkët evropiane në raport me lekun.

Ndërkohë që duket se edhe të paktën për muajin gusht monedha e përbashkët europiane do të jetë nën trysni të forta nënçmumese për shkak të pritshmërive për rritje të shifrave nga turizmi. Një euro kaq e dobët shihet me shqetësim nga ata shqiptarë që vijnë të kalojnë pushimet pranë familjeve, si dhe ata që dërgojnë rregullisht remitanca në Shqipëri. Eksporuesit janë një tjetër kategori e prekur nga nënçmimi i fortë të monedhës së përbashkët europiane, të cilin Qeveria e lidh me performacën pozitive të ekonomisë shqiptare.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.