Euro, në nivelin më të lartë në 1 vit – FED sinjalizon fundit e ciklit të rritjes së interesave, në fokus BQE
Dollari amerikan po qëndron në rënie të konsiderueshme në sesionin e sotëm, pasi rezerva Federale njoftoi fundin e ciklit të rritjes së interesave. Edhe rreziku që mund të përbëjë sistemi bankar amerikan ka ushtruar presin mbi monedhën e gjelbër. Rezerva Federale rriti sërish normën bazë të interesit me 25 pikë bazë, sikurse pritej nga investitorët, dhe paralajmëroi se do të ketë rritje të tjera nëse do të jetë e nevojshme.
Kjo deklaratë e shefit të FED, Jerome Powell, bëri që dollari amerikan të zhvlerësohet ndjeshëm përballë shportës me 6 monedhat kryesore ndërkombëtare. Paundi britanik është rritur në nivelin më të lartë në 11 muajt e fundit, pranë 1.26 dollarëve, ndërsa euro po tregtohet në nivelin më të lartë në 1 vit, pranë 1.1080 dollarëve.
Indeksi që mat ecurinë e dollarit amerikan përballë shportës me 6 monedhat kryesore ndërkombëtare po qëndron në rreth 101.1, ndërsa në sesionin e kaluar humbi rreth 0.6% të vlerës. Në fokus të tregjeve, tashmë do të jetë takimi i Bankës Qendrore Europiane, që zhvillohet ditën e sotme. Në tregun e kriptomonedhave, bitcoin po tregtohet në rreth 29 mijë dollarë, ndërsa ethereum po tregtohet në rreth 1900 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.