Nafta rikuperon pjesërisht humbjet – Gjatë 3 sesioneve të fundit ka rënë me mbi 9%

Nafta i është rikthyer fitimeve në sesionin e sotëm, por në tre sesionet e kaluara ka humbur rreth 9% të vlerës, për shkak të shqetësimeve për ngadalësimin e kërkesës. Nafta Brent e Londrës po tregtohet në rreth 72 dollarë për fuçi, ndërsa nafta Bruto amerikane po tregtohet në rreth 68 dollarë për fuçi.

Gjatë ditës së sotme, çmimet po mbështeten nga Rezerva Federale, që sinjalizoi një periudhë pushimi me rritjen e interesave. Megjithatë, tregu po gjendet nën presion, për shkak se të dhënat në Kinë sinjalizojnë një ngadalësim të sektorit të manifakturës. Në fokus të tregjeve, tashmë do të jetë Banka Qendrore Europiane dhe Banka e Anglisë, të cilat pritet të rrisin normën bazë të interesit me 50 pikë bazë, në takimet e sotme.

Për sa i përket furnizimit të tregut, Organizata e Vendeve Eksportuese të Naftës, OPEC, dhe aleatët e  tjerë vendosën muajin e kaluar të ulin prodhimin edhe me 1.16 milionë fuçi naftë në ditë, në totalin e 3.66 milionë fuçive në ditë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.