Euro nën 103 lekë, çfarë po rikthen luhatjet e korrikut? – Volumi i eurove në qarkullim shumë i lartë, kërkesa për blerje e ulët nga të gjitha drejtimet

Pas një lloj stabiliteti në tremujorin e tretë, veçanërisht gjatë periudhës gusht-tetor, afrimi i festave të fundvitit ka rithyer ritmet e zhvleftësimit të euros në raport me lekun. Luhatshmëria dhe pasiguria e shtuar që karakterizuan muajin korrik, duket se po rikthehen pas gjysmës së nëntorit. Të enjten, euro ra nën vlerën mesatare prej 103 lekësh, duke ju rikthyer vlerave rekord të shënuara gjatë muajit korrik. Ajo u shit të enjten me 102.50 lekë dhe u ble me 103.25 lekë, me një kur mesatar prej 102.88 lekësh.

Ajo që stabilizoi nënçmimin e euros në gusht, pas luhatjeve të forta të korrikut, ishte kërkesa e fortë e ardhur veçanërisht nga individët për blerjen e saj, të cilët tërhoqën nga tregu një volum të konsiderueshëm të monedhës së përbashkët evropian.

Dhe duket se është pikërisht raporti kërkesë ofertë ai që po risjell ritmet e forta mbiçmuese të lekut në raport me monedhën e përbashkët evropiane. Aktorët e tregut valutor në vend, të pyetur nga Televizioni Scan thanë se aktulisht ka një volum të lartë eurosh në qarkullim, ndërkohë që kërkesa për blerje është e ulët.

Një prej motiveve të nevojës së ulët për euro është ritmi i shtuar i blerjeve të valutës në muajin gusht, gjë që mund të ketë ezauruar një pjesë të kërkesës. Ndërkaq, për shkak të situatës së mirë hidrike, Qeverisë nuk i është dashur të grumbullojë sasi të konsiderueshme eurosh, për të importuar energji duke pasur gjithashtu rol në volumin e lartrë të valutës që arkullon në treg. Nga ana tjetër, vetë sektori bankar ka tkurrur ndjeshëm kreditimin në valutë për shkak të rritjeve të normave të interesit nga ana e bankës Qendrore Evropiane, gjë që ka lehtësuar gjithashtu nevojën për blerje eurosh në tregun e brendshëm.

Gjithësesi, e rëndësishme është që aktorët presin rritje të presione nënçmuese ndaj euros me afrimin e festave, por veçanërisht me sinjalet shumë të zbehta që jep kërkesa për valutë të huaj, veçanërisht euro, në tregun financiar shqiptar.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.