Euro tenton “revanshin” ndaj lekut – Për të katërtën ditë në radhë fiton rreth 3 pikë. “Ringrihet” edhe dollari

Pasi preku “fundin” gjatë këtij viti në nivelin 105.62 lekë, monedha e përbashkët europiane po tenton të ringrihet. Sipas kursit zyrtar të publikuar nga Banka e Shqipërisë, euro është këmbyer mesatarisht 107.87 lekë, duke u shitur me 107.41 dhe blerë me 108.31 lekë. Ndërkohë, në tregun e lirë valutor të enjten në orët e mesditës euro u ble me 107.4 dhe u shit me 108.4 lekë. Që nga fillimi I këtij viti, kur preku nivelin më të lartë prej 117.46 lekë, monedha e përbashkët europiane ka regjistruar një zhvlerësim të shpejtë prej gati 12 lekë.

Pothuajse të njëjtën ecuri ka patur nga fillimi i vitit edhe dollari amerikan ku më 6 janar preku pikën më të lartë prej 111.75 lekë dhe më 9 qershor atë më të ulët prej 98.07 lekë. Një zhvlerësim disi më i “përmbajtur” ndaj monedhës sonë prej 3 pikësh. Ndërsa të enjten në mesditë u tregtua mesatarisht 99.47 lekë.

Rënia e këtyre dy valutave kryesore botërore u detyrohet prurjeve të mëdha të valutës në treg. Sektori që është prekur më shumë nga zhvlerësimi i euros, por edhe i dollarit amerikan, janë eksportuesit, përfshirë ata të shërbimeve dhe mallrave. Sipas të dhënave nga shoqata “Proeksport Albania”, vetëm për industrinë e veshjeve dhe këpucëve e cila mban peshën kryesore humbjet nga kursi i këmbimit nga muaji Janar deri Maj 2023 llogariten rreth 11 milionë euro, ndërsa pritshmëria është që për muajin Qershor të jenë dhe 3 milion euro të tjera humbje.

Për të lehtësuar eksportuesit, qeveria ka vendosur që tatimpaguesit eksportues, të cilët në vitin 2022 kanë eksportuar jo më pak se 70% të vlerës së përgjithshme të shitjeve, përfshirë eksportet, nuk  do të paguajnë këstet që parapaguhen në muajt qershor, shtator dhe dhjetor të vitit 2023 si dhe do të reduktohen afatet për rimbursimin e TVSH-së. Por sipas kompanive, kjo ndërhyrje nuk është e mjaftueshme për të zgjidhur situatën.

Në Asamblenë e Përgjithshme të Jashtëzakonshme të organizuar këtë të hënë nga shoqata “Proeksport Albania”, është kërkuar urgjentisht subvencion për të kompensuar humbjet. Ndërkohë, bizneset do të hartojnë kërkesat zyrtare adresuar Ministrisë së Financave dhe Bankës së Shqipërisë për secilin nga sektorët.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.