Europa synon automjete elektrike më të lira – Prodhuesit janë nën presionin e importeve të mëdha nga Kina

Përballë furtunës së importeve të automjeteve elektrike kineze, industria evropiane e automobilave mund të jetë duke u përpjekur për të paimagjinueshmen. Armiqtë e betuar, përkatësisht grupet Volkswagen, Renault dhe Stellantis, po mendojnë të punojnë së bashku, të koordinojnë përpjekjet e tyre dhe të ndërtojnë automjete elektrike të lira për të mbijetuar.

Konkurentët e tyre kinezë dhe Tesla amerikane, kanë ekspozuar prej kohësh dobësitë e prodhuesve më të mëdhenj të automjeteve në Europë për sa i përket elektrifikimit. Pra, vazhdimi i biznesit si zakonisht do t’i çojë ata në zhdukje, siç theksojnë herë pas here disa analistë.

Në mënyrë shumë karakteristike, drejtori menaxhues i Stellantis, thekson se “tani e kuptojmë se në të ardhmen ato kompani që nuk mund të përballen me konkurrencën kineze do të kenë probleme serioze”. Stellantis, u krijua nga bashkimi i vitit 2021 i Fiat-it të Italisë dhe Grupit PSA të Francës.

Ndërkohë, i kishte paraprirë blerja e amerikanit Chrysler nga Fiat. Sot, drejtuesit europianë të industrisë së makinave po debatojnë propozime, duke filluar nga bashkimi i burimeve të zhvillimit te grupimi ndërkufitar i bizneseve, për të adresuar në mënyrë efektive sfidat një herë në 30 vjet. Shitjet e automjeteve tërësisht elektrike këtë vit pritet të rriten me ritmin më të ngadaltë që nga viti 2019.

Edhe për Tesla-n ky zhvillim ka pasur një ndikim, duke e detyruar atë të ulë gradualisht çmimet e automjeteve. Aksionet e saj kanë rënë 20% që nga fillimi i vitit, duke ‘fshirë’ rreth 150 miliardë dollarë nga kapitalizimi i tregut, më shumë se dyfishi i vlerës së Volkswagen. Pavarësisht urgjencës së industrisë për të trajtuar problemin, ka kufizim nga ana e qeverive.

Shumë po tërheqin stimujt e subvencioneve për të blerë një automjet elektrik. Kompanitë e makinave me qira po pyesin se si do të përballojnë kostot e larta të riparimit, ndërkohë që konsumatorët po zhgënjehen çdo ditë me politikat klimatike që prekin kuletat e tyre. Ndërkohë, zgjedhjet e ardhshme të Parlamentit Europian këtë verë dhe SHBA në fund të vitit mund të nxisin më tej ndjesinë negative kundër automjeteve elektrike.

Në vitin 2025, rregulla më të ashpra të emetimeve do të hyjnë në fuqi në Bashkimin Europian, kështu që prodhuesit duhet të shesin më shumë makina me bateri, ose do të përballen me gjoba të rënda.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.