Fasonët, brenda pak ditësh gati garancia sovrane – Prençe: 70% e kredive mbulohet nga sistemi bankar

Qeveria pritet të miratojë gjatë kësaj jave detaje në lidhje me instrumentin e Garancisë Sovrane për sektorin e industrisë përpunuese fason. Për SCAN TV kryetari i ‘’Pro-Export Albania’’, Edvin Prençe ka thënë se ajo që është vendosur nga bankat në dakordësi me Ministrinë e Financave në tavolinën teknike dhe me grupimin e manifakturës, pritet të jetë aktive brenda pak ditësh.

“Shpresojmë që akti normativ të jetë aktiv në fund të javës së ardhshme dhe kjo do të bëjë të mundur aplikimin nga ana e bizneseve. Shpresojmë që përqindja e kredisë të jetë sa më e ulët, pasi në këtë mënyrë do të jetë sa më gjithëpërfshirëse dhe në ndihmë të bizneseve”- ka thënë Prençe.

Ky instrument në ndihmë në sektorit fason parashikohet të jetë me terma më pozitivë dhe lehtësues se sa garancitë sovrane që qeveria ka ndërmarrë në periudhën e pandemisë. Kjo lloj kredie mbulohet rreth 70% nga sistemi bankar.

“Duke marrë parasysh këtë garanci sovrane dhe shumë politika të tjera zhvilluese, do të bëjnë të mundur që ky sektor të kalojë në ciklin e plotë, që është një vlerë e shtuar për ekonominë shqiptare, për pagat e punonjësve dhe për vetë biznesin që të rimarrë veten”- shton kreu i “Pro-Export Albania”.

Prençe ka thënë se për ta bërë markën ‘’Made in Albania’’ më të njohur, projektligji i ri për Dhomën Ekonomike Kombëtare ku të gjithë bizneset do të jenë të detyruara të regjistrohen, është pozitiv.

“Duhet patur parasysh që garancia sovrane është e ndarë në dy forma, e para për investime në makineri dhe e dyta për blerjet  e lëndëve të para, pra sektori ka nevojë për asete e promovim dhe çertifikimi për të qënë të sigurta për vendet e BE, është pozitiv” – thekson ai.

Sipas kreut të ‘’Pro-Export Albania’’ për shkak të vështirësive të likuidetit e sidomos nga kursi i këmbimit, humbja e këtij sektori vetëm gjatë vitit 2023, ishte rreth 150 mln euro.

Alida Lula / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.