Fenomeni i vjedhjes së ullinjve në Greqi – Kultivuesit pajisin pemët me GPS dhe punësojnë roje private

Kultivuesi grek i ullirit Panajotis Tsafaras është detyruar të ruajë pemët e tij dy herë në ditë për të shmangur hajdutët që përpiqen të vjedhin të korrat ndërsa çmimet rriten në një kohë korrjeje të dobët. Tsafaras është grabitur dy herë, ku hajdutët i kanë vjedhur më shumë se një ton ullinj muajin e kaluar.

Është hera e parë që kjo ndodh në rajon, shprehet Tsafaras, i cili ka korrur ullinj gjatë gjithë jetës së tij në qytetin bregdetar të Filiatra në gadishullin jugor të Peloponezit. Ai po mendon të marrë masa më ekstreme, si instalimi i kamerave dhe gjurmuesve GPS në pemë si dhe punësimi i sigurisë private, siç kanë bërë disa të tjerë në Greqi.

Tsafaras thotë se hajdutët godasin natën. Ata përdorin shufra për të shkundur ullinjtë nga pemët ose sharrë elektrike me zinxhir ‘të heshtur’ për të prerë degë të tëra që i ngarkojnë në kamionë. Për të mos u kapur ata nxjerrin vajin në zona të ndryshme nga rajoni në të cilin është vjedhur prodhimi.

Policia greke konfirmoi se ka një rritje të vjedhjeve të ullinjve dhe vajit të ullirit në të gjithë vendin këtë vit. Greqia është prodhuesi i tretë më i madh në botë i vajit të ullirit pas Italisë dhe Spanjës, të cilat kanë regjistruar fenomene të ngjashme. I njohur si “ekstra i virgjër”, varieteti grek është veçanërisht i kërkuar për cilësinë e tij të lartë.

Prodhimi i këtij viti vlerësohet në një rënie deri në 50% në rreth 170.000 ton, sipas zyrtarëve. Rendimenti do të jetë më i ulëti ndër vite, kryesisht për shkak të kushteve të paqëndrueshme të motit, duke përfshirë stuhitë, thatësirat dhe temperaturat në rritje që kanë tharë ullinjtë.

Rënia e prodhimit ka dyfishuar çmimet e shitjes me shumicë të vajit të ullirit në 8-9 euro për litër, sipas zyrtarëve të qeverisë. Çmimet e shitjes me pakicë kanë arritur deri në 14 euro, duke e bërë ullirin një objektiv tërheqës për hajdutët. Filiatra është një qytet i qetë në një fushë pjellore me 5 milionë pemë që kontribuojnë në 10-12% të prodhimit të ullinjve të Greqisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.