Rritet varfëria shëndetësore në Itali – 10% më shumë njerëz se një vit më parë kërkojnë ndihmë

Në vitin 2023 në Itali, pothuajse 430 mijë njerëz u gjendën në kushte të varfërisë shëndetësore, të cilëve iu desh të kërkonin ndihmë nga një prej organizatave shëndetësore për të marrë ilaçe dhe trajtime falas. Një shifër e cila sipas raportit të 11-të “Dhurimi për kurim – Varfëria shëndetësore dhe dhurimi i barnave”, është rritur me 10% krahasuar me vitin e kaluar, kur ishin 386 mijë persona në situata të varfërisë shëndetësore.

Ndërsa shpenzimet familjare farmaceutike rriten, pesha që përballon Shërbimi Shëndetësor Kombëtar ulet. Në vitin 2022, në fakt, shpenzimet totale të shëndetësisë janë të barabarta me 22.46 miliardë euro, 2.3 miliardë më shumë krahasuar me vitin 2021. Krahasuar me një vit më parë, familjet -të varfra dhe jo vetëm, kanë paguar 704 milionë euro më shumë nga xhepi i tyre. Në gjashtë vjet 2017-2022, shpenzimet e kujdesit shëndetësor dhe farmaceutikës familjare janë rritur me 1.84 miliardë euro,  +22.8%.

Të gjitha familjet po e mbështesin rritjen nga xhepat e tyre, jo vetëm ato të varfrat, të cilët duhet të paguajnë të gjithë koston e barnave pa recetë. Refuzimi për të kryer vizita specialistike, pesë herë më i lartë se ai i pjesës tjetër të popullsisë, kontribuon në cenimin e gjendjes shëndetësore të familjeve të varfra në vështirësi ekonomike.

Raporti në këtë drejtim kujton se organizatat jofitimprurëse kryesisht aktive në shërbimet shëndetësore janë 12578 dhe punësojnë 103 mijë persona. Prej tyre, 5.587 financojnë aktivitetet e tyre kryesisht nga burime publike. Duke marrë parasysh vetëm këtë nëngrup, organizatat jofitimprurëse përfaqësojnë të paktën një të pestën e totalit të objekteve shëndetësore italiane, mbi 27.000, duke gjeneruar një vlerë prej 4.7 miliardë euro.

Më në fund, konfirmohet lidhja rrethore midis varfërisë së të ardhurave dhe varfërisë shëndetësore: përqindja e atyre në kushte të këqija ose shumë të këqija shëndetësore është më e lartë midis atyre në kushte të pasigurta ekonomike sesa në pjesën tjetër të popullsisë. Për më tepër, cilësia e jetës e lidhur me probleme serioze shëndetësore është më e keqe për ata me më pak burime sesa për ata me të ardhura mesatare-të larta – 25.2% krahasuar me 21.7%. Burimet ekonomike nuk mbrojnë në vetvete nga patologjitë serioze, sidomos me rritjen e moshës, por lejojnë një përballje më të mirë me pasojat e tyre.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.