Fermerët polakë kërkojnë tërheqjen e qeverisë nga “Marrëveshja e Gjelbër”

Fermerët polakë protestojnë kundër importeve të grurit nga Ukraina dhe kundër masave të BE për mbrojtjen e mjedisit. Ditën e sotme ata mbushën rrugët e Varshavës duke kërkuar që qeveria polake të tërhiqet nga “Marrëveshja e Gjelbër” e Bashkimit Europian, një plan që ndër të tjera synon të luftojë ndryshimet klimatike duke reduktuar përdorimin e pesticideve.
Slavodmir Izdebski, Kryetari i Sindikatës së Organizatave Bujqësore, theksoi se bashkë me fermerët në kryeqytetin polak kanë ardhur edhe minatorët e sindikatës “80 Gushti”, shoferë kamionësh dhe punëtorë të tjerë të pakënaqur.

Fermerët protestojnë edhe kundër importit pa taksa të produkteve bujqësore nga Ukraina. Produktet bujqësore ukrainase duhet të kalojnë tranzit përmes Polonisë. Fermerët shprehen se produktet hyjnë në tregun polak dhe ulin çmimet. Pas pushtimit rus dy vjet më parë, BE pezulloi të gjitha detyrimet dhe kuotat e importit për produktet bujqësore nga Ukraina për të ndihmuar ekonomikisht vendin.
Fermerët dhe kamionistët polakë kanë bllokuar vazhdimisht pikat kufitare për mallrat ukrainase për muaj të tërë. Ukraina është e indinjuar, sepse fermerët e saj kultivojnë fushat duke rrezikuar jetën e tyre. Kohët e fundit, produktet bujqësore ukrainase janë derdhur nga kamionë dhe trena të mallrave.

Por, fermerët polakë nuk janë të vetmit që po protestojnë. Javët e fundit, rreth gjysma e vendeve anëtare të Bashkimit Evropian kanë parë që protestat rurale kundër politikave të tyre bujqësore përkatëse kombëtare dhe evropiane të intensifikohen. Kërkesat ndryshojnë në Gjermani ashtu si në Greqi ku fermerët janë të mërzitur për shkurtimet e planifikuara të subvencioneve të naftës, dhe në Poloni dhe vende të tjera të Evropës Lindore, ata po bllokojnë rrugët dhe pikat kufitare për të parandaluar importet e lira nga Ukraina.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.