Sony do të shkurtojë rreth 900 vende pune në divizionin e saj PlayStation

Sony do të shkurtojë rreth 900 vende pune në divizionin e saj PlayStation, ose rreth 8% të fuqisë punëtore të saj globale, duke u bërë kompania më e fundit në sektorin e teknologjisë dhe lojërave që njofton pushime masive nga puna. Sony përmendi ndryshimet në industri si një arsye për ristrukturimin.

“Industria ka ndryshuar jashtëzakonisht, dhe ne duhet të përgatitemi për të ardhmen për të ngritur biznesin për atë që na pret”, tha CEO i Sony Interactive Entertainment, Jim Ryan në një postim në blog të martën.

“Ne duhet të përmbushim pritshmëritë nga zhvilluesit dhe lojtarët dhe të vazhdojmë të nxisim teknologjinë e ardhshme në lojëra, kështu që bëmë një hap prapa për t’u siguruar që jemi të përgatitur për të vazhduar të sjellim përvojat më të mira të lojrave në komunitet,” shtoi Ryan.

Pushimet nga puna të njoftuara të martën mbërrijnë një muaj pasi Microsoft tha se do të shkurtojë rreth 2,000 punëtorë pas blerjes së Activision Blizzard. Riot Games, zhvilluesi i lojës popullore të betejës me shumë lojtarë “League of Legends”, tha gjithashtu në janar se po pushonte 11% të stafit të saj.

Shkurtimet e vendeve të punës do të ndodhin në Amerikë, Japoni, Europë, Lindjen e Mesme, Afrikë dhe rajonin e Azisë Paqësorit.

Në Londër, PlayStation Studio do të mbyllet plotësisht. Prerje do të bëhen edhe në studion Firesprite. Përveç kësaj, reduktimet do të ndodhin në funksione të ndryshme në të gjithë Sony Interactive Entertainment në MB, tha kompania.

Përfitimet e largimit nga puna do t’u ofrohen atyre punonjësve që ndikohen.

“Ndërsa këto janë kohë sfiduese, kjo nuk është tregues i mungesës së fuqisë së kompanisë sonë, markës sonë ose industrisë sonë,” tha Ryan. “Qëllimi ynë është të mbetemi të shkathët dhe të adaptueshëm dhe të vazhdojmë të fokusohemi në ofrimin e përvojave më të mira të mundshme të lojërave tani dhe në të ardhmen.”

​Edel Strazimiri / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.