“Bie deri në 25% konsumi për produktet vendase” – Hoxha: Skema e mbështetjes nuk ka dhënë rezultat. Ndihmë direkte për fermerët

Produktet vendase të bylmetit po humbasin terren, në raport me produktet e importuara. Donjaldo Hoxha, drejtor i shoqatës së “Industrisë së përpunimit të qumështit” thotë se ka një rënie të konsumit deri në 25 për qind për produkte të caktuara.

I ftuar në emisionin “Box to Box” Hoxha ka kërkuar që të aplikohen skema subvencionuese për fermerët mbi bazën e prodhimit të qumështit, dhe jo për krerë kafshësh të limituara sikundër është aktualisht.

Skema kombëtare për blegtorinë parashikon subvencione për tufën bazë të matrikulluar, për fermat me jo më pak se 100 krerë dele dhe/ose dhi, në vlerën 1,200 lekë/krerë, por jo më shumë se 360,000 lekë për familje, ndërsa për fermat jo më pak se10 krerë lopë, në vlerën 10, 000 lekë/krerë por jo më shumë se 500,000 lekë.

Kjo masë është e pamjatueshme nisur nga kostot e larta, por edhe fakti që nuk ka arritur të amortizojë disa nga shqetësimet e kahershme, siç janë parandalimi i rënies apo reduktimit të numrit të bagëtive dhe informalitetin e sektorit.

Vështirësitë me të cilat hasen fermerët si pasojë e kostove të shtuara, subvencionet e munguara, konkurrenca e pandershme dhe informaliteti mbeten disa nga shqetësimet që sipas Hoxhës duhen adresuar në mënyrë që të mos rrezikojmë daljen nga tregu të produktit vendas.

Ada Hazizolli / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.