Home banking rritet 22% në vitin 2023 – Mbi 7 milionë transaksione, ose afërisht 20 milionë euro të transferuara

Shërbimet home banking kanë njohur rritje të dukshme gjatë vitit të shkuar, duke regjistruar në total një volum prej më shumë se 7 milionë transaksionesh. Sipas të dhënave nga Banka e Shqipërisë, nga  6,279,470 transaksioneve të kryera përmes bankingut online në vitin 2022, totali i tyre është shtuar me 22% duke arritur në 7,666,810 në fund të vitit që sapo lamë pas.

Ndërkohë që edhe më i madh ka qenë volumi i parave të transferuara përmes këtyre transaksioneve. Nga 1,5 miliardë lekë në vitin 2022, totali i vlerave monetare të transferuara përmes shërbimeve home banking ka kaluar në mbi 2 miliardë për vitin 2023, ose afërisht 20 milionë euro.

Ka qenë muaji dhjetor i vitit të shkuar ai që ka shënuar si numrin më të madh të transaksioneve, ashtu dhe volumin më të lartë të tyre. Gjatë këtij muaji janë kryer në total mbi 750 mijë transaksione, me një volum prej rreth 2.8 milionë eurosh.

Banka e Shqipërisë publikon të dhënat e home banking që prej vitit 2015, kur numri i transaksioneve ishte vetëm 1.4 milionë, ndërkohë që volumi i tyre ishte rreth dhjetë herë më i vogël nga sa është aktualisht.

Aktualisht, një pjesë e mirë e bankave tregtare ofrojnë forma të ndryshme të internet banking, i njohur ndryshe edhe si online banking, ose electronic banking (e-banking). Sfida e kësaj industrie është dizenjimi i këtij kanali të ri për ofrimin e shërbimeve bankare, në mënyrë të thjeshtë e të besueshme për t’u përdorur nga klientët.

Në fund të fundit, bankat kanë breza të tërë që përpiqen të fitojnë besimin tonë dhe nuk mund të rrezikojnë gjithçka me një faqe interneti të ngatërruar, të lodhshme e mbi të gjitha jo të sigurt.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.