Festohet “Dita e Evropës” edhe në Tiranë – Motoja, gjithëpërfshirja dhe të drejtat e njeriut

9 maji, Dita e Evropës shënon paqen dhe unitetin në Evropë. Në këtë datë është përvjetori i deklaratës historike të ministrit të Jashtëm francez Robert Shuman për krijimin e Komunitetit Evropian të Qymyrit dhe Çelikut në 1950, duke hedhur themelet e asaj që sot është Bashkimi Evropian.

Tematika sot është promovimi i gjithëpërfshirjes, diversitetit dhe të drejtave të njeriut. Ambasadori i Bashkimit Evropian në Shqipëri, Silvio Gonzato, theksoi vlerat mbi të cilat është krijuar BE-ja, të cilat duhen promovuar edhe në Shqipëri.

“Sot është një mundësi e mirë për të folur për Evropën, për atë Evropë që ndoshta njerëzit nuk e kanë shumë parasysh. Evropa shoqërohet me tregun e përbashkët, por ka të bëjë edhe me vlerat e demokracisë, sundimit të ligjit, barazisë, mosdiskriminimit, këto janë pjesë e të ashtuquajtërës kushtetuta jonë, ndaj tema e kësaj jave është përfshirja, diversiteti dhe të drejtat e njeriut, sepse këto janë vlerat që frymëzojnë shoqëritë tona dhe shpresoj fort që të frymëzojnë edhe shoqërinë shqiptare ndërkohë që rrugëton drejt Bashkimit Evropian. Jam takuar me njerëz të profileve dhe entiteteve të ndryshme edhe në Gjirokastër dhe pasuria që vjen prej kësaj, pasuria e shoqërisë shqiptare që pata mundësi të dëshmoja është një vlerë e jashtëzakonshme dhe duam ta kremtojmë atë.”

Në kuadër të Ditës së Evropës u zhvillua një panair mbi mbështetjen që Bashkimi Evropian jep për vendin tonë, organizatat e shoqërisë civile, institucionet shtetërore apo private dhe ndërhyrjeve financiare në fushën e bujqësisë, të drejtave të njeriut, rinisë dhe shëndetësisë.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.