Sa vlejnë asetet natyrore të Pogradecit, Selenicës e Roskovecit – Qirjo: Të përfshihet në llogaritë kombëtare, orientim për zhvillimin

“Nëse do ta shisnim një bashki, sa do të kushtonte? Roskoveci del 259 mld lekë, Selenica 895 mld lekë sepse ka bitum dhe minerale të tjera, ndërsa Pogradeci është 13 mld euro”.

Këto vlera përfshijnë kapitalin natyror të 3 bashkive të vendit, si një vlerësim që kryhet për herë të parë në vendin tonë. Mihallaq Qirjo, i cili është një prej ekspertëve që ka kryer vlerësimin thotë se kapitali natyror janë të gjithë elementet që prodhojnë vlera dhe përfitime për njerëzit, nga uji, toka, mineralet, biodiversiteti, etj.

“Këtu nuk është vlera vetëm çfarë shet e merr përditë, por është edhe vlera potenciale që gjendet nën tokë apo mbi tokë”, – thotë Qirjo.

Sipas Qirjos kapitali natyror duhet të inventarizohet dhe të përfshihet në llogaritë kombëtare.

“Ka një diskutim mbi kapitalin natyror, që mund të futet në llogaritë kombëtare, pra të inventarizohet, të pwrllogaritet dhe të jepet llogari për të. Nëse do të futet një ditë në llogaritë kombëtare, në të ardhmen e afërt sepse vendet e tjera e kanë, ata do të jenë të detyruar që çdo vit ta rishohin kapitalin natyror dhe për vit, ndoshta të japin një lloj llogarie se përse vlera e kapitalit natyror ka shkuar poshtë dhe nuk ka shkuar lart,, si kuotat në bursë dhe çfarë duhet të bëjmë ne për të shkuar lart”, – thotë eksperti.

Paralelisht, ky vlerësim do të shërbente edhe për orientimin për zhvillimin e duhur që duhet të kenë territore apo zona të caktuara.

“Pra, jo vetëm që na vendos përpara një përgjegjësie, por edhe na tregon rrugën për të ardhmen se ku mund të ndodhë zhvillimi në këto zona”, – shprehet ai.

Kategoritë e kapitalit natyror përfshijnë burimet minerare, energjetike, ujore, bujqësinë dhe blegtorinë, pyjet dhe kullotat apo biodiversitetin.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.