FMN risheh me rritje ekonominë e Shqipërisë – Parashikimi/ 3.6% në 2023-shin,  Mali i zi kryeson rajonin

Fondi Monetar Ndërkombëtar (FMN) parashikon se ekonomia shqiptare do të rritet më 3.6 për qind në vitin 2023. Në publikimin e fundit global, FMN ka rritur me 1.4 pikë përqindje parashikimin për ecurinë e ekonomisë shqiptare, duke qenë se  në muajin Prill, progresi projektohej në nivelin 2.2 për qind. Ndërsa për vitin e ardhshëm FMN i qëndron vlerësimeve të prillit, për një rritje prej 3.3%.

Në krahasim me rajonin, Fondi Monetar Ndërkombëtar parashikon që Mali i Zi do të ketë rritjen më të lartë ekonomike në rajon, duke lënë ndjeshëm pas vendet e tjera, më pas renditet Kosova me 3.8%, Shqipëria, Maqedonia e Veriut me 2.5% dhe Serbia me 2 %  e Bosnje-Hercegovina po ashtu me 2%.

Pak ditë më parë edhe Banka Botërore ka rishikuar në rritje me 0.8% pritshmëritë për rritjen ekonomike të Shqipërisë në vitin 2023, duke projektuar tashmë 3.6%, nga 2.8% që ishte ky parashikuar në qershor të këtij viti.

Megjithatë në raport ka listuar rreziqe që mund të ndikojnë në këtë parashikim, siç janë luhatjet e kursit të këmbimit, kursi i këmbimit, normat e interesit, rritja e çmimeve të ushqimeve dhe energjisë elektrike, etj.

Ndryshe nga dy institucionet më lart, Banka Europiane për Rindërtim dhe Zhvillim (BERZH) në publikimin e saj më të fundit ka lënë ta pandryshuar, ashtu si në publikimin e majit, rritjen e ekonomisë së Shqipërisë për këtë vit në 2,5%. Me argumentin se perspektivat partnerit kryesor tregtar të Shqipërisë, Italisë janë anemike dhe inflacioni i ushqimeve është ende i lartë. Ndërsa, qeveria shqiptare parashikon që ekonomia të rritet me 3.7 për qind. Sa i takon ekonomisë globale, FMN parashikon ngadalësim në 3 për qind këtë vit, nga 3,5 për qind në vitin 2022.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.