Fondi rekord i rimëkëmbjes së BE-së në rrezik ndërsa vendet përpiqen të përmbushin afatin!

Rreziku që qeveritë e Bashkimit Europian nuk do të jenë në gjendje të shpenzojnë paketën më të madhe të ndihmës në historinë e tij po rritet ndërsa anëtarët luftojnë për të përmbushur afatet e vendosura nga blloku, kanë thënë zyrtarë nga katër vende për Reuters.

Vështirësitë në rinegocimin e planit të rimëkëmbjes pas pandemisë prej 724 miliardë eurosh – më pak se dy vjet pasi u miratua – ngre dyshime rreth aftësisë së tij për të respektuar afatet, tha Manuel Hidalgo, një bashkëpunëtor i lartë në Qendrën Esade për Politikat Ekonomike, Think-tank me bazë në Madrid.

“Nëse të gjitha paratë nuk shpenzohen, kjo do të ketë një kosto reputacioni për BE,” tha Hidalgo. “Nëse nuk rezulton mirë, ata do të duhet të justifikojnë shumë gjëra, siç është vetë ekzistenca e këtyre lloj planeve.”

Çështja më e mprehtë do të jetë sigurimi i unanimitet nga 27 anëtarët e bllokut për zgjatjen e disbursimit të financimit përtej vitit 2026, gjë që do të kërkonte miratimin në parlamentin e secilit vend, duke përfshirë Hungarinë dhe Poloninë, të cilat tashmë janë në kundërshtim me BE-në dhe mund të përdorin mbështetjen e tyre si levë për të siguruar koncesione.

BE ngriu fondet e destinuara për Hungarinë dhe Poloninë për shkak të historisë së qeverive të tyre nacionaliste për të nënvlerësuar rregullat liberale demokratike.

Qasja e Polonisë në afro 36 miliardë euro fonde varet nga një rishikim i sistemit të saj gjyqësor. BE-ja po mban 5.8 miliardë euro derisa Hungaria të zbatojë masat për të frenuar korrupsionin dhe për të rritur pavarësinë e gjyqësorit të saj.

Zgjatja e periudhës së zbatimit përballet me “një problem të madh që vendimi për burimet e veta do të duhet të rihapet, gjë që kërkon unanimitet, gjë që është pothuajse e paimagjinueshme”, tha zëdhënësi i Ministrisë Çeke për Çështjet e BE-së, Marek Zeman.

Vendet janë tashmë prapa. Ndërsa piketat dhe objektivat duhet të arrihen deri në gusht 2026, 70% e granteve dhe huave duhet të ishin zotuar deri në vitin e kaluar dhe pjesa e mbetur deri në vitin 2023. Shuma aktuale e angazhuar deri më tani është rreth 20%, sipas të dhënave të BE-së.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.