Forcohet besimi për bankat në SHBA – Regjistrohen rritje në depozita në fillim të muajit prill

Depozitat në bankat tregtare të SHBA-së shënuan rritje në fillim të prillit në një shenjë të përtërirë besimi në sektorin bankar pas daljeve masive të depozitave pas dështimit të muajit të kaluar të dy bankave të mëdha rajonale.

Të dhënat e publikuara nga Rezerva Federale treguan se depozitat në të gjitha bankat tregtare u rritën në 17.43 trilionë dollarë në javën e përfunduar më 5 prill, mbi një bazë jo të rregulluar sezonalisht, nga 17.35 trilionë dollarë një javë më parë.

Rritja u nda pothuajse në mënyrë të barabartë midis 25 bankave më të mëdha dhe bankave të vogla dhe të mesme. Kjo i la depozitat në bankat më të mëdha mbi nivelet para falimentimit të Silicon Valley Bank dhe Signature Bank, por në bankat e vogla janë ende më pak se nivelet e tyre të mëparshme.

Bankat e vogla u goditën veçanërisht rëndë nga flukset dalëse të depozitave pas dështimeve të njëpasnjëshme, me disa depozitues që zhvendosnin paratë e gatshme në institucione më të mëdha me shqetësimet se llogaritë me bilanc që tejkalojnë kufirin federal të sigurimit prej 250 mijë dollarësh mund të jenë në rrezik.

Pas më shumë se një viti rritjesh të mprehta të normave të interesit nga FED që synon ngadalësimin e ekonomisë dhe ftohjen e inflacionit, trazirat bankare të muajit të kaluar dukej se do të krijonin kushte edhe më të shtrënguara kreditimi sesa ato që po jepeshin nga rritja e normës së Fed.

Një rënie e depozitave mund t’i lërë bankat me kapacitet të zvogëluar për kredi, megjithëse ende të dhënat e FED nuk kanë treguar shumë ndikim. Huatë dhe qiratë në të gjitha bankat ranë në 12.06 trilionë dollarë, nga 12.07 trilionë dollarë një javë më parë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.