Nafta qëndron mbi 80 dollarë për fuçi – Investitorët monitorojnë rimëkëmbjen e Kinës

Çmimet e naftës u rritën lehtë të hënën, të mbështetur nga planet e OPEC+ për të ulur më shumë prodhimin, ndërkohë që investitorët monitorojnë të dhënat ekonomike kineze për shenja të një rikuperimi të kërkesës nga konsumatori numër 2 i naftës në botë.

Kontratat e së ardhmes së naftës së papërpunuar Brent u rritën 6 cent në 86.37 dollarë për fuçi, ndërsa nafta e papërpunuar e Teksasit Perëndimor u tregtua në 82.56 dollarë për fuçi. Të dyja kontratat shënuan fitimet e tyre të katërta javore javën e kaluar pasi Agjencia Ndërkombëtare e Energjisë – IEA – parashikoi kërkesë rekord në 2023 – shin prej 101.9 milionë fuçi në ditë, 2 milionë fuçi në ditë më shumë se vitin e kaluar.

Megjithatë, IEA paralajmëroi në raportin e saj mujor se reduktimet e prodhimit të vendosura nga prodhuesit e OPEC+ rrezikonin të përkeqësonin një deficit të furnizimit me naftë që pritet në gjysmën e dytë të vitit dhe mund të dëmtojnë konsumatorët dhe rimëkëmbjen ekonomike globale.

Rritja e kostove për furnizimet e papërpunuara të Lindjes së Mesme, të cilat plotësojnë më shumë se gjysmën e kërkesës së Azisë, tashmë po ‘shtrëngojnë’ marzhet e rafinerëve, duke i shtyrë ata të sigurojnë furnizime nga rajone të tjera. Rafineritë po rrisin gjithashtu prodhimin e benzinës përpara pikut të kërkesës në verë, ndërsa reduktojnë prodhimin e naftës mes marzheve të përkeqësuara.

Ndërkohë, eksportet e naftës nga Iraku verior në portin turk të Ceyhanit mbetën të bllokuara pothuajse tre javë pasi një çështje arbitrazhi vendosi që Ankaraja i detyrohej Bagdadit kompensim për eksportet e paautorizuara. Investitorët do të analizojnë publikimin e të dhënave të prodhimit të brendshëm bruto të tremujorit të parë të Kinës këtë javë, të cilat pritet të jenë pozitive për çmimet e mallrave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.